विराटनगर । नेकपा माओवादी केन्द्रका अध्यक्ष पुष्पकमल दाहाल प्रचण्डलाई विराटनगरमा पत्रकारहरूले कडा प्रश्न गरेपछि उत्तर दिन हम्मे हम्मे परेको छ ।
मोरङ र झापामा हुने कार्यक्रममा सहभागी हुन त्यसतर्फ गएका प्रचण्डलाई विराटनगर विमानस्थलमा पत्रकारहरूले र्याख र्याख्ती पारे ।
भिजिट भिसा प्रकरणमा गृहमन्त्री रमेश लेखकले राजीनामा दिनुपर्ने अडान राख्दै सदन अवरोध गरिरहेको माओवादीले शुक्रबार कांग्रेस र एमालेसँग सहमति गरेपछि यो विषय अग्नि सापकोटाको मुद्दासँग जोडिएर लेनदेन भएको चर्चा छ ।
विराटनगरमा पत्रकारहरूले प्रचण्डलाई सोही प्रश्न सोधेका थिए ।
तर, आफ्ना उपाध्यक्ष अग्नि सापकोटाविरुद्धको हत्या मुद्दा मिलाउने सर्तमा कांग्रेस–एमालेसँग सहमति गरेको भन्ने आरोपलाई उनले ‘वाहियात’ भने।
प्रचण्डले भने, ‘वाहियात कुरा मानिसहरूले प्रचार गर्ने गर्या छन्, त्यस्तो केही पनि होइन, यो कुरा र अग्नि (सापकोटा) को कुनै साइनो सम्बन्ध छैन।’
निकै तनावमा देखिएका प्रचण्डले कांग्रेस र एमालेसँग किन सहमति गर्नुपर्यो भन्ने कुरा खुलाएनन् । तर भने, ‘जनताको बृहत् हितका निम्ति कहिले अघि बढ्ने, कहिले पछि हट्ने, कहिले सहमति गर्ने कहिले चाहिँ विद्रोह गर्ने यो सबै चलिराख्छ।’
माओवादी केन्द्रका उपाध्यक्ष सापकोटाविरुद्ध काभ्रेका अर्जुन लामाको हत्या गरेको मुद्दा सर्वोच्च अदालतमा विचाराधीन छ।
भिजिट भिसा प्रकरणमा गृहमन्त्री रमेश लेखकले राजीनामा दिनुपर्ने अडान राख्दै सदन अवरोध गरिरहेको माओवादी केन्द्र सहमतिमा आएपछि शुक्रबार सभामुख देवराज घिमिरेले बाँकी विपक्षी दललाई पेलेरै प्रतिनिधि सभाको बैठक चलाए।
माओवादी अध्यक्ष प्रचण्डले भने भिजिट भिसा प्रकरणमा एक महिनाभित्र समिति बनाएर जाने सहमति भएपछि अहिले सदन चालु गर्न मात्र सहमति गरेको दाबी गरे।
भिजिट भिसा प्रकरणमा अध्ययन, छानबिन गरेर आवश्यक नीतिगत संरचना सबै बनाउने र एक महिनाभित्र छानबिन समिति बनाउने भनेर संसद्मा गृहमन्त्रीले प्रतिबद्धता गरेपछि गरेको सहमतिलाई मुद्दा छाडेको भन्न नमिल्ने तर्क प्रचण्डले गरे।
विराटनगर विमानस्थलमा पत्रकारहरूले प्रश्न गर्दा पनि उनले अरू दिनजस्तो खुलेर कुरा गरेनन्। उनी अस्वाभाविक तनावमा रहेको भनेर नेता–कार्यकर्ताहरू बताउँछन् ।
शुक्रबार प्रतिनिधि सभा बैठकको अवरोध हटाउन भन्दै माओवादी केन्द्रले शुक्रबार सत्तारुढ नेकपा एमाले र नेपाली कांग्रेससँग दुईबुँदे सहमति गरेपछि यतिबेला अध्यक्ष प्रचण्डविरुद्ध विभिन्न टिकाटिप्पणी भइरहेको छ। यो विषयले प्रचण्डलाई पार्टीभित्रै पनि समस्या भइरहेको कतिपय नेताहरूको दाबी छ।
