काठमाडौँ । अमेरिकाको अध्यागमन एजेन्सीले अवैध आप्रवासीविरुद्ध गरिरहेको धरपकडको विरोधमा क्यालिफोर्नियाको लस एन्जलस सहरमा लगातार तीन दिनदेखि विरोध प्रदर्शन भइरहेको छ।
प्रदर्शन चर्किएपछि आइतबार अमेरिका राष्ट्रपति डोनाल्ड ट्रम्पले लस एन्जलसमा २ हजार राष्ट्रिय गार्ड तैनाथको आदेश दिएका छन्।
यसैबीच अमेरिकाका पूर्वउपराष्ट्रपति कमला ह्यारिसले ट्रम्प प्रशासनको यो कदमको आलोचना गरेकी छन्।
साथै लस एन्जलसका मेयर करेन बासले ट्रम्प प्रशासनलाई अराजकता फैलाएको आरोप लगाएकी छन्।
अमेरिकाको आप्रवासनसम्बन्धी संघीय निकाय इमिग्रेसन एन्ड कस्टम इन्फोर्समेन्ट (आईसीई वा आइस)का कारबाहीविरुद्ध विरोध प्रदर्शन भएको हो ।
ट्रम्पले दङ्गा भड्काउन खोजेको आरोप
क्यालिफोर्निया राज्यका गभर्नर गेभिन न्युसमले आपत्ति जनाउँदा जनाउँदै ट्रम्पले २ हजार क्यालिफोर्निया न्याशनल गार्डलाई सङ्घीय आदेश अनुसार परिचालन गरिदिए अनि रक्षामन्त्री पिट हेग्सेथले यूएस मरिनहरू परिचालनका लागि उच्च तहको सतर्कतामा राखिएको बताए – यदि तिनको परिचालन भए त्यो एकदम दुर्लभ घटना हुनेछ जब स्वदेशभित्र नै सक्रिय सैनिक खटिने छन्।
स्थानीय समय आइतवार बिहानसम्ममा न्याशनल गार्डले शान्ति पुनर्बहाली गरेको भन्दै ट्रम्पले विजयको घोषणा गरे जबकि ती गार्ड पूर्णतः भेला भइसकेकै थिएनन्।
बीबीसीका अनुसार गभर्नरले नचाहँदा नचाहँदै परिचालित न्याशनल गार्डले प्रदर्शनकारीलाई हटाउन अश्रुग्यास तथा रबरका गोली चलाएका छन्।
ट्रम्पले प्रदर्शनकारीहरूलाई ‘हिंस्रक, विद्रोही जत्था’ भनेका छन्। तर गभर्नर न्यूसमले राष्ट्रपतिले तनाव भड्काएको आरोप लगाउँदै आफ्नो राज्यको सार्वभौमिकतामाथि दखल दिएको भनेका छन्।
अमेरिकाभरिका विभिन्न राज्यका २२ जना डेमोक्र्याटिक गभर्नरहरूले गभर्नर न्यूसमलाई समर्थन गर्दै विज्ञप्ति जारी गरेका छन्।
