सन्धिखर्क । लागुऔषध दुर्व्यसन, सामाजिक अन्धविश्वास तथा कुरीति हटाउन अर्घाखाँचीको भूमिकास्थान नगरपालिकामा युवा सचेतना अभियान सञ्चालन गरिएको छ ।
कानुनले वर्जित गरे पनि समाजमा लुकेर रहेको बालविवाह, महिला तथा जातीय विभेद, घरेलु हिंसाजस्ता सामाजिक विकृतिजन्य कुरीति र दुर्व्यसन नियन्त्रण गर्न नगरपालिकाको दशओटै वडामा यस्तो अभियान सञ्चालन गरिएको हो ।
नगरपालिकाको आर्थिक सहयोगमा नगरस्तरीय युवा सञ्जालले दशओटै वडाको प्रतिनिधित्व हुने गरी पाँच स्थानमा पाँच सय बढी युवालाई सहभागी गराएर युवा सचेतना कार्यक्रम सञ्चालन गरिएको भूमिकास्थान युवा सञ्जालका संयोजक टेकराज भुसालले बताउनुभयो ।
भुसालका अनुसार गत शुक्रबार भूमिकास्थान वडा नं. ९ र १० का युवाको सहभागितामा धनचौरमा सचेतना कार्यक्रम गरी आरम्भ गरिएको उक्त कार्यक्रम आइतबार भूमिकास्थान वडा नं. ३ र ४ का युवाको सहभागितामा धारापानीमा कार्यक्रम गरि समापन गरिएको छ ।
अभियानमा हिमाली अनुसन्धान केन्द्र काठमाडौँका प्रतिनिधि पुरन पोख्रेलले लागु औषध के हो ? दुर्व्यसन के हो ? मानिसहरू लागुऔषधको सिकार किन हुन्छन् ? कसरी छुटाउन सकिन्छ ? जस्ता विषयमा युवालाई अभिमुखीकरण गर्नुभएको थियो ।
त्यस्तै, सामाजिक कुरीति, कुप्रथा र अन्धविश्वास के हो ? यसले मानिस र समाजलाई कसरी झेलेको छ ? मुक्त कसरी हुने भन्ने विषयमा ट्रस्ट नेपाल खोटाङका अध्यक्ष गोमा राईले प्रशिक्षण गर्नुभएको थियो ।
जेठ १६ देखि १८ गते धनचौर, नुवाकोट, असुरकोट, ढाकाबाङ र धारापानी युवा तथा सरोकारवालाको सहभागितामा सम्पन्न अभियानमा सञ्जालका संयोजक भुसाल र पत्रकार गोपालप्रसाद भट्टराईले सहजीकरण गर्नुभएको थियो ।
विकृति रोक्न सहयोग हुनेछ : थापा
कार्यक्रममा मन्तव्य राख्दै एक्काइसौँ शताब्दीमा पनि समाजमा जरा गाडेर बसेको बोक्सी, धामी, महिनाबारी बार्ने, बालविवाह, जातीय छुवाछुत र कुलतजस्ता समाजका हानिकारक विकृतिलाई रोक्न युवा सचेतना अभियानले प्रभाव पार्ने नगरप्रमुख झबिलाल थापाको भनाइ थियो ।
भौतिक निर्माणले मात्रै समाज समृद्ध हुन नसक्ने भन्दै नगरप्रमुख थापाले दिगो विकासको निम्ति सामाजिक कुरीति र दुर्व्यसन कारक बनेको पनि उहाँले बताउनुभयो ।
नागरिक सचेत नभएसम्म भौतिक सुविधाले सन्तुष्टि नमिल्ने निष्कर्षसहित आफूहरूले यस्ता कार्यक्रम अगाडि बढाएको उहाँको भनाइ थियो ।
सचेत युवाको एकताले समाजमा व्याप्त कुप्रथा र दुर्व्यसनी न्युनीकरण गदै समृद्ध समाज बनाउन सकिने विश्वास व्यक्त गर्दै थापाले कर्म र उत्पादनमा जोडिन सबै नागरिकलाई अपिल गर्नुभयो ।
कार्यक्रममा नगर उपप्रमुख बालकृष्ण बन्जाडे र प्रमुख प्रशासकीय अधिकृत जग्दीशचन्द्र नेपालीले नगरपालिकाको अभियानमा सबैको हातेमालो जरुरी रहेको बताउनुभएको थियो ।
कार्यक्रममा नगरपालिकासँगै भूमिकास्थान वडा नं. १ का वडाध्यक्ष गोपाल खनाल, वडा नं. २ का वडाध्यक्ष बुद्धिबहादुर थापा, वडा नं. ३ का वडाध्यक्ष कृष्णप्रसाद बन्जाडे, वडा नं. ४ का वडाध्यक्ष बाबुराम पन्थी, वडा नं. ५ का वडाध्यक्ष जयगोपाल श्रेष्ठ, वडा नं. ८ का वडाध्यक्ष राजकुमार श्रेष्ठ र वडा नं. १० का वडाध्यक्ष खगिश्वर पन्थी, कार्यपालिका सदस्य तथा वडासदस्य, वडासचिव, शिक्षक प्रतिनिधि, स्वास्थ्यचौकीका प्रतिनिधि, प्रहरीसहित सामाजिक अगुवाको अग्रणी सहयोग रहेको थियो ।
