पोखरा । कास्कीमा क्रियाशील राष्ट्रिय जनमोर्चासहितका पाँच दलले सार्वजनिक सरोकारका विभिन्न विषय समेटी संयुक्त संघर्ष गर्ने जनाएका छन् ।
१७ औँ गणतन्त्र दिवसका अवसरमा बुधबार भएको अन्तरक्रिया कार्यक्रममा दलहरूले गणतन्त्रको रक्षा, भ्रष्टाचार र अनियमितताको विरोधका साथै पोखराका सामाजिक–सार्वजनिक सरोकार, जस्तै सुकुम्बासी समस्या, सहकारी पीडितका समस्या, फेवातालको मापदण्ड, बसपार्क लगायतका विषयमा संघर्ष गर्ने घोषणा गरेका हुन् ।
राष्ट्रिय जनमोर्चा, नेपाल समाजवादी पार्टी (नयाँ शक्ति), नेपाल कम्युनिष्ट पार्टी, नेकपा बहुमत, नेकपा र क्रान्तिकारी कम्युनिष्ट पार्टीले संयुक्त रूपमा संघर्षका कार्यक्रम चाँडै सार्वजनिक गर्ने जानकारी दिएका छन्।
बुधबार ‘अनियमितता, ढिलासुस्ती र भ्रष्टाचार विरुद्ध, विकास, समृद्धि र सुशासनका पक्षमा’ अन्तरक्रिया कार्यक्रम आयोजना गरिएको थियो ।
नेपाल समाजवादी पार्टी, कास्कीका जिल्ला संयोजक राजु क्षेत्रीको सञ्चालनमा अघि बढेको कार्यक्रमका अध्यक्षता नेपाल कम्युनिष्ट पार्टी कास्कीका जिल्ला सचिव उमेश सि र स्वागत क्रान्तिकारी कम्युनिष्ट पार्टी कास्की संयोजक विक्रम थापाले गर्नुभएको थियो ।
यस्तै, विषय प्रवेशसहितको मन्तव्य राष्ट्रिय जनमोर्चा गण्डकी प्रदेश संयोजक शंकर बरालले राख्नुभएको थियो ।
त्यस अवसरमा संयोजक बरालले भन्नुभयो, ‘यदि भ्रष्टाचार र अनियमितता अन्त्य गर्न दलहरू स्वयं सच्चिन तयार छैनन् भने यो व्यवस्था आफैं ढल्नेछ। राजावादी आउन पर्दैन ।’
अन्तरक्रियामा मुख्य बहसका विषयहरू पोखरा क्षेत्रीय अन्तर्राष्ट्रिय विमानस्थलमा देखिएको ठेक्का प्रक्रिया र निर्माणमा अनियमितता, फेवाताल मापदण्ड, संरचना व्यवस्थापन र सर्वोच्च अदालतको आदेशको कार्यान्वयन, स्थानीय तहको पारदर्शिता, जवाफदेहिता र नागरिक सहभागितामा आधारित विकास, विकास, समृद्धि र सुशासनमा केन्द्र र स्थानीय सरकारको भूमिका – जनअपेक्षा र यथार्थबीचको अन्तरलगायत थिए ।
कार्यक्रममा आर्थिक विश्लेषक तथा पोखरा उद्योग वाणिज्य संघका पूर्वअध्यक्ष आनन्दराज मुल्मीले देशको आर्थिक अवस्था नाजुक भएको उल्लेख गर्दै राजनीतिक दलभित्र मौलाएको आर्थिक अपारदर्शिता र जवाफदेहिता अभावले जनताको भरोसा कमजोर भएको दाबी गर्नुभयो।
यस्तै, नागरिक मञ्च गण्डकी संयोजक विष्णुप्रसाद बराल र नेकपा (माओवादी केन्द्र) कास्की संयोजक विश्वप्रकाश लामिछानेले फेवातालको मापदण्ड, बसपार्क निर्माण र सार्वजनिक सम्पत्तिको संरक्षणप्रति गम्भीर चिन्ता व्यक्त गर्नुभयो।
नेकपा (बहुमत) स्थायी समिति सदस्य गुणराज लोहनीले राज्य जनताप्रति उत्तरदायी नभएपछि आफनो पार्टी जनकारबाहीमा उत्रन बाध्य भएको स्पष्ट पार्नुभयो।
नेकपा (एकीकृत समाजवादी)का केन्द्रीय सचिव श्रीनाथ बराल, गण्डकी सचिव ठाकुर शर्मा, नेकपाका पोलिटब्युरो सदस्य आस्था सी, नेपाल समाजवादी पार्टीका केन्द्रीय सदस्य टीकाराम पौडेल, क्रान्तिकारी कम्युनिष्ट पार्टीका केन्द्रीय सल्लाहकार रामजी थापा लगायतका वक्ताहरूले भ्रष्टाचार, ढिलासुस्ती, जनविरोधी योजनाहरू विरुद्ध संघर्ष आवश्यक रहेको धारणा व्यक्त गर्नुभयो।
कार्यक्रममा राष्ट्रिय जनमोर्चा कास्कीका अध्यक्ष रविमोहन ढकालले सबै सहभागी वक्ता, अतिथि र दर्शकहरूलाई धन्यवाद ज्ञापन गर्नुभएको थियो ।
