काठमाडौँ । नेपाल समाजवादी पार्टी (नयाँ शक्ति) का अध्यक्ष डा. बाबुराम भट्टराईको सचिवालयले नेकपा माओवादी केन्द्रका अध्यक्ष पुष्पकमल दाहाल प्रचण्डको अभिव्यक्तिप्रति आपत्ति जनाएको छ ।
प्रचण्डले बाबुरामलाई ‘बुद्धि नभएको डाक्टर’ भनेकोप्रति भट्टराईको सचिवालयले आपत्ति जनाएको हो ।
रुकुमपूर्वमा आयोजित पत्रकार सम्मेलनमा पत्रकारहरूले बाबुराम भट्टराईसँग पार्टी एकता सम्भव छ भनेर सोध्दा जवाफमा प्रचण्डले आक्रोशित हुँदै भनेका थिए, ‘सबैभन्दा बुद्धि नभएको डाक्टर भनेर चिन्छन् मान्छेले। त्यस्तासँग के गरी एकता गर्ने?’
उनले थप भनेका थिए, ‘खिइँदाखिइँदै अब त पूरै प्रतिक्रियावादीसँग गएर मिल्नुभएको छ। प्रतिक्रियावादीले पनि पत्याउँदैनन् आजभोलि। हाँसोको पात्र भएका छन् बाबुराम देशभरि। कस्तो बुद्धि नभएको डाक्टर।’
प्रचण्डको सो अभिव्यक्तिप्रति भट्टराईका स्वकीय सचिव रेखी गुरुङले प्रचण्डलाई ‘राजनीति ठग’ भनेका हुन् ।
सामाजिक सञ्जालमार्फत उनले बाबुरामले आफ्नो क्षेत्र गोरखा–२ नछाडेको भए सांसद बन्ने अवस्था नभएको बताएका छन्।
‘बाबुरामलाई बुद्धि नभएको भन्नु र प्रचण्डलाई कम्युनिष्ट ठान्नुु आफैँमा दुई ठूला राजनीतिक जोक हुन्,’ उनले भने, ‘बाबुरामले आफ्नो क्षेत्र (गोरखा) नछोडेका भए राजनीतिक ठगी गर्न सिपालु प्रचण्ड सायद सांसद पनि बन्ने थिएनन्। यो मानेमा बाबुरामलाइ सोझो र बुद्धि नभएको ठान्ने धेरै गोरखालीहरू मैले पनि भेटेको छु, सुनेको छु।’
उनले प्रचण्डलाई सत्ताको खेलाडी र बाबुरामलाई परिवर्तनको संवाहक पनि भनेका छन्।
