लक्ष्मण बेलबासे, काठमाडौँ ।
नेपाल पत्रकार महासङ्घ काठमाडौँले काठमाडौँ महानगरपालिकालाई सात बुँदे ध्यानाकर्षणपत्र बुझाएको छ ।
महासङ्घकी अध्यक्ष शोभा अर्यालको नेतृत्वमा २०८२ जेठ ६ गते मङ्गलबार महानगरपालिकाको कार्यालयमा पुगेर नगर उपप्रमुख सुनिता डङ्गोललाई ध्यानाकर्षण गराइएको हो ।
ध्यानाकर्षणपत्रमा स्वरोजगारमूलक मिडियाका लागि विशेष योजना तथा नीति बनाउनुपर्ने, लोककल्याणकारी विज्ञापन र फेलोसिपको व्यवस्था हुनुपर्ने, साप्ताहिक, पाक्षिक, मासिक तथा मध्यम खालका दैनिक छापामाध्यम तथा अनलाइन सञ्चारमाध्यमको संरक्षण र प्रवर्द्धन गर्नुपर्ने, जिल्ला शाखामा तालिम, गोष्ठी, सेमिनारका लागि न्यूनतम २५ लाख रुपियाँ उपलब्ध गराउन माग गरिएको छ ।
त्यस्तै, विभिन्न भाषाभाषी, महिला, दलित, आदिवासी तथा जनजाति प्रकाशक तथा सम्पादक रहेका मिडियालाई प्राथमिकता दिइनुपर्ने, स्थानीय तहबाट मिडियामैत्री काननुन बनाइनुपर्ने र महासङ्घसित महानगरपालिकाले सहकार्य गर्नुपर्ने माग पत्रमा समेटिएको छ ।
प्रतिनिधिमण्डलमा पदाधिकारी, कार्यसमितिका सदस्य र सल्लाहकारहरूको उपस्थिति थियो ।
‘मिडिया बचाऊ अभियान’ अन्तर्गत महासङ्घ काठमाडौँले काठमाडौँ महानगरपालिकासहित जिल्लाका ११ ओटै पालिकामा ध्यानाकर्षणपत्र बुझाइएको अध्यक्ष अर्यालले जानकारी दिनुभयो ।
