काठमाडौँ । सत्तारुढ नेकपा (एमाले) लुम्बिनी प्रदेश सभा सदस्य विष्णुप्रसाद पन्थीविरुद्ध मोरङ जिल्ला अदालतले २०८१ जेठ ३२ गते पक्राउ आदेश जारी गरेको थियो ।

तर सत्तारुढ दलको नेता भएका कारण हातमा पक्राउ पूर्जी बोकेको प्रहरीले उनलाई देखे पनि नदेखे झैँ गरिरहेको छ। उनी प्रदेश सभामा नियमित आउजाउ गरिरहेका छन्

प्रहरीको पक्राउको लिस्टमा रहेका पन्थी सोमबार प्रधानमन्त्री केपी शर्मा ओली सहभागी कार्यक्रममा पनि देखिए । सार्वजनिक कार्यक्रममा देखिइरहने सांसद पन्थी बुद्ध जयन्तीका अवसरमा लुम्बिनीमा आयोजित कार्यक्रममा प्रधानमन्त्रीसँगै थिए ।

हरेक भाषणमा शुसासनका कुरा गर्न नछुटाउने प्रधानमन्त्री ओलीसँग पक्राउ पुर्जी जारी भएका सांसद मञ्चमा सँगै देखिएको भन्दै संसदमा प्रश्न उठेको छ ।

नेकपा (माओवादी केन्द्र) का सांसद रणेन्द्र बरालीले यसबारे कुरा उठाएका हुन् मंगलबारको प्रतिनिधिसभाको बैठकमा बोल्दै सांसद बरालीले प्रहरीले भेट नभएको भनिरहेका सांसद प्रधानमन्त्रीसँगै देखिनु सुशासनको नमुना भएको भन्दै व्यंग्य गरे।

प्रहरीको पक्राउको लिस्टमा रहेका पन्थी

‘सुशासनको ठेक्का लिएको सरकार छ। पक्राउ पुर्जी जारी भएको आफ्नै सांसद छन्। प्रहरी प्रशासन जाँदा भेट नभएको जानकारी आउँछ’ उनले भने, ‘प्रधानमन्त्रीसँग कुम ठेलेर मञ्चमा बस्ने। सुशासनको कुन चाहिँ नमूना हो?’

पन्थीविरुद्ध ०८१ जेठमा जिल्ला अदालत मोरङबाट पक्राउ पुर्जी जारी भएको थियो। तर, उनी अझै पक्राउ परेका छैनन्।

विराटनगरको पल्लवी इलेक्ट्रा प्रालिबाट पाल्पाको सिस्नेस्थित एक हाइड्रोपावर कम्पनीका लागि सामान खरिद गरेर पैसा चुक्ता नगरेपछि जिल्ला प्रहरी कार्यालय मोरङले अदालतबाट पक्राउ पुर्जी लिएर पन्थीलाई पक्राउका लागि प्रहरी प्रधान कार्यालयसँगै जिल्ला प्रहरी परिसर काठमाडौं, काठमाडौं उपत्यका अपराध अनुसन्धान कार्यालय टेकु र जिल्ला प्रहरी कार्यालय रुपन्देहीमा पत्र पठाएको थियो।

कपिलवस्तु वाणगंगा नगरपालिका राजपुरका पन्थी कपिलवस्तु निर्वाचन क्षेत्र १ (क) बाट निर्वाचित भएका हुन्।