काठमाडौँ । अखिल नेपाल महिला सङ्घकी अध्यक्ष मीना पुनले जनता निराश भएको मौका छोपेर राजावादी तत्त्व सल्बलाएको बताउनुभएको छ ।
राष्ट्रिय जनमोर्चा काठमाडौँको आयोजनामा २०८२ वैशाख २७ गते शङ्खरापुर नगरपालिकाको जहरसिंहपौवामा आयोजित सभालाई सम्बोधन गर्दै उहाँले सो अभिव्यक्ति दिनुभएको हो ।
‘सत्तारूढ दलको गलत नीतिका कारण नेपाली जनता निराश छन्’ उहाँले भन्नुभयो– ‘यही मौका छोपेर राजावादीले कैयौँ भ्रम दिइरहेका छन् ।’
गणतन्त्रप्रति नेपाली जनताको समर्थन छैन भनेर राजावादीले दिएको पहिलो भ्रमको उहाँले प्रतिवाद गर्नुभयो ।
उहाँले भन्नुभयो– ‘गणतन्त्रप्रति जना अडिग छन् । अवश्य पनि सरकारप्रति भने जनताको असन्तुष्टि छ ।’
नेपालका राजाहरू कहिल्यै संवैधानिक भएर बस्न नसकेको बताउँदै उहाँले देशलाई पुनः राजतन्त्रतर्फ लैजान नसकिने बताउनुभयो ।
‘नेपाली जनता राजा शक्तिमा आएको देख्न चाहन्नन्’ पुनको भनाइ थियो ।
राजा शक्तिमा आए राष्ट्रियता बलियो हुने, सुशासन आउने र भ्रष्टाचार हट्ने दाबीको पनि उहाँले खण्डन गर्नुभयो ।
‘राजा महेन्द्रकै समयमा कालापानीमा भारतीय सेना बसेको हो’ उहाँले भन्नुभयो– ‘निरङ्कुश राजतन्त्रकै बेलामा मूर्ति तस्करी हुन्थ्यो, राजालाई सबैभन्दा बढी ढुकुटी जान्थ्यो ।’
गणतन्त्रपछिका सत्तारूढ दलले सुशासन दिन नसकेकाले प्रतिगामी तत्त्वले यस्तो स्थितिलाई उपयोग गर्न सक्ने धारणा उहाँको थियो ।
राजनीति फोहर हुँदा जनताले दुःख पाए : थापा
राजमो केन्द्रीय सदस्य तथा बागमती प्रदेश समितिका अध्यक्ष लालबहादुर थापाले राजनीति फोहर हुँदा जनताले दुख पाएको अभिव्यक्ति दिनुभयो ।
‘हामीले देखेका छौँ, जहाँको राजनीति फोहर हुन्छ, त्यहाँका जनताले दुःख पाउँछन् । नेपाली जनताले पनि त्यही कारण दुःख पाइरहेका छन्’ थापाले भन्नुभयो ।
सत्तामा पुगेका गणतान्त्रिक शक्तिको गलत कार्यशैलीकै कारण प्रतिगामी तत्त्व सल्बलाएको उहाँको भनाइ थियो ।
‘२०४६ सालपछिका सरकारले नै राष्ट्रिय उद्योगधन्दा निजीकरण गरेर जनतामा वितृष्णा फैलाएका थिए’ उहाँले भन्नुभयो– ‘२०६२–६३ सालपछिका सरकारले पनि यस्तै गलत नीति अपनाइरहँदा दैनिक दुई हजार बढी युवा विदेश पलायन भइरहेका छन् ।’
नेता थापाले गणतन्त्रका विरुद्ध प्रतिगामीले षड्यन्त्र गरिरहेकाले त्यसको रक्षाका लागि सम्बन्धित पक्ष गम्भीर हुनुपर्ने बताउनुभयो ।
रगतसित साटेर ल्याएको गणतन्त्रको रक्षा गर्नेछौँ : रेग्मी
कार्यक्रमलाई सम्बोधन गर्दै नेकपा (मसाल) काठमाडौँका प्रवक्ता जगतप्रसाद रेग्मीले रगतसित साटेर ल्याएको गणतन्त्रको रक्षा नेपाली जनताले गर्ने ठोकुवा गर्नुभयो ।
उहाँले भन्नुभयो– ‘रगतसित साटेर ल्याएको गणतन्त्र विरुद्ध कोही आउँछ भने हामी त्यसका विरुद्ध एकगठ भएर सङ्घर्ष गर्नेछौँ ।’
उहाँले गणतन्त्रको विकल्प जनगणतन्त्र वा नयाँ जनवाद र समाजवाद भएको बताउँदै राजतन्त्रले वर्तमान व्यवस्थाको विकल्पको रूपमा काम नगर्ने बताउनुभयो ।
अहिलेको समस्या सङ्घीयता भएको बताउँदै प्रवक्ता रेग्मीले भन्नुभयो– ‘अहिलेको खराबी सङ्घीयता हो, गणतन्त्र होइन ।’
उहाँले गणतन्त्र व्यवस्था भएको तर सङ्घीयता प्रणाली भएकाले गणतन्त्र होइन, सङ्घीयता हटाउनुपर्ने धारणा उहाँको थियो ।
राजमो काठमाडौँका अध्यक्ष झविन्द्र बेलबासेको अध्यक्षतामा अघि बढेको उक्त सभाको सञ्चालन सचिव छवि खनालले गर्नुभएको थियो ।
