दाङ । राष्ट्रिय जनमोर्चा लुम्बिनी प्रदेश समितिका अध्यक्ष बोमबहादुर खत्रीले कसैले चाहदैमा राजतन्त्र फर्किन नसक्ने बताउनुभएको छ ।
राजमो तुलसीपुर नगर समितिले २०८२ वैशाख २५ गते बिहिबार तुलसीपुरमा गरेको प्रतिगमन विरुद्धको विरोध सभालाई सम्बोधन गर्दै उहाँले कसैले सडकमा राजा आउ भन्दैमा देहवसान भइसकेको राजतन्त्र नफर्किने बताउनुभयो ।
नागरिकले राजाभन्दा पनि सुदृढ गणतन्त्र चाहेको उहाँको भनाइ छ ।
उहाँले देशमा गणतन्त्र ल्याउन नागरिकले बलीदानी गरेको स्मरण गर्दै अहिले नागरिकले जनवादी गणतन्त्र चाहेको बताउनुभयो ।
नेतृत्वको गलत क्रियाकलापकै कारण नागरिकमा वितृष्णा जागेको फाइदा उठाउँदा राजावादी सल्बलाएको अध्यक्ष खत्रीको धारणा थियो ।
उहाँले गणतन्त्रको रक्षाका लागि नै राष्ट्रिय जनमोर्चाले देशव्यापी रूपमा प्रतिगामी खतराका विरुद्धमा लागेको बताउनुभयो ।
त्यस्तै, नेकपा (मसाल) दाङका प्रवक्ता भरत भण्डारीले गणतन्त्र कसैको दया, माया र भिख मागेर नआएको बताउँदै नेपाली जनताले रगतसँग साटेर ल्याएको बताउनुभयो ।
राजतन्त्रले २५० वर्षमा गरेको अत्याचारकै कारण नागरिकले बलिदानीपूर्णबाट राजतन्त्रको अन्त्य गरी गणतन्त्र ल्याउन सफल भएको धारणा उहाँले राख्नुभयो ।
उहाँले नागरिकलाई भन्दा पनि एउटा दुर्गा प्रसाईलाई राजा चाहिएको स्पष्ट पार्नुभयो ।
राष्ट्रिय जनमोर्चा दाङका अध्यक्ष गणेश आचार्य जनताले बलिदानीपूर्ण सङ्घर्षबाट ल्याएको गणतन्त्रणका विरुद्धमा विचार र भावना आउँदै गर्दा जनमोर्चाले प्रतिगामीका विरुद्ध सङ्घर्षका कार्यक्रम अघि सारेको बताउनुभयो ।
सरकारको नेतृत्व गर्नेहरू जनभावना विपरीत काम गर्दा अहिलेको व्यवस्था विरुद्ध प्रतिगामी शक्ति सल्बलाएको उहाँको बुझाइ थियो ।
राजमो तुलसीपुर नगर समितिका अध्यक्ष श्यामलाल पोखरेलको अध्यक्षतामा उक्त कार्यक्रम सम्पन्न भएको हो ।
कार्यक्रमको सहजीकरण अखिल नेपाल किसान महासङ्घ (अप्फा) दाङका जिल्ला अध्यक्ष ऋषिराम पौडेलले गर्नुभएको हो ।
