काठमाडौं । राष्ट्रिय जनमोर्चाले नेपालको नयाँ नक्सा अनुरुप निशानछाप परिवर्तनका लागि सरकारले संसदमा प्रस्तुत गरेको संविधान संशोधन प्रस्तावलाई समर्थन गरेको छ । सोमबार विज्ञप्ति प्रकाशित गरी अध्यक्ष केसीले सरकारको प्रस्तावको समर्थन गर्नुभएको हो ।
विज्ञप्तिमा अध्यक्ष केसीले निशानछापबारेको संशोधन प्रस्ताव पेश भएका बेला अन्य विषयमा संविधान संशोधन गर्न खोज्नु मूल विषयबाट ध्यान हटाउने प्रयत्न भएको बताउनुभएको छ ।
राजमो अध्यक्ष केसीले आफ्नो पार्टीले संघीयता खारेजीका लागि संविधान संशोधन गर्नुपर्ने धारणा राख्दै आएको सन्दर्भमा निशानछापको मूल विषयबाट ध्यान अन्यत्र जान नदिने र उपयुक्त समयमा त्यो प्रस्ताव ल्याउने बताउनुभएको छ ।
तर, अन्य कुनै पक्षले संविधानमा संशोधनसम्बन्धी कुनै प्रस्ताव ल्याएमा हामीले पनि संघीयताको खारेजसम्बन्धी आफ्नो संशोधन प्रस्तावलाई तत्काल नै प्रस्तुत गर्ने केसीले स्पष्ट पार्नुभएको छ ।
केसीले विज्ञप्ति प्रकाशित गरेको केहीबेरमै सोमबार मधेशवादी दलहरु राजपा र समाजवादी दलले आफ्ना एजेण्डा संविधानमा घुसाउन संविधान संशोधन प्रस्ताव दर्ता गराएका छन् ।
।
यस्तो छ विज्ञप्तीः
‘संविधानमा नक्सा र निशान छापसम्बन्धी संशोधन प्रस्तावलाई राष्ट्रिय जनमोर्चाले समर्थन गर्दछ । त्यो आम रूपमा थाहा भएको कुरा हो र, त्यसकारण हामीले त्यसबारे कुनै व्याख्या गर्नुपर्ने आवश्यकता ठान्दैनौँ ।
हाम्रो यो पनि मत रहेको छ कि सरकारले संसदमा प्रस्तावित गरेको संविधानमा नेपालको नक्सा र निशान छापसम्बन्धी संशोधनलाई सर्वसम्मतिले स्वीकार गर्नुपर्दछ ।
हाम्रो पार्टीले संसदमा सङ्घीयताको खारेजीको लागि संविधानमा संशोधन प्रस्ताव राख्ने कुरा पहिलेदेखि नै स्पष्ट गर्दै आएको छ । तर नेपालको नक्सा र निशान छापसम्बन्धी सरकारले ल्याएको संशोधन प्रस्ताव नै अहिलेको मुख्य राष्ट्रिय प्रश्न हो भन्ने हाम्रो पार्टीको मत रहेको छ ।
त्यसैले अहिले संविधानमा संशोधनसम्बन्धी अन्य प्रस्तावलाई प्रस्तुत गरेर सरकारले ल्याएको उक्त संशोधन प्रस्तावलाई कमजोर पार्नु हामीले उचित ठानेका छैनौँ । त्यसैलेपछि उपयुक्त समयमा सङ्घीयताको खारेजसम्बन्धी प्रस्तावलाई संसदमा प्रस्तुत गर्ने गरी तत्कालको लागि हामीले हाम्रो प्रस्तावलाई संसदमा प्रस्तुत नगर्ने विचार गरेका छौँ ।
तर अन्य कुनै पक्षले संविधानमा संशोधनसम्बन्धी कुनै प्रस्ताव ल्याएमा हामीले पनि सङ्घीयताको खारेजसम्बन्धी आफ्नो संशोधन प्रस्तावलाई तत्काल नै प्रस्तुत गर्ने कुराको जानकारी गराउन चाहन्छौँ ।’
