शङ्करप्रसाद पोख्रेल, बुटवल ।
नेकपा (मसाल) का महामन्त्री मोहनविक्रम सिंह सम्मानित हुनुभएको छ ।
२०८२ वैशाख २० गते शनिबार औपचारिक कार्यक्रममाझ मार्क्सवादी विचार मञ्च महामन्त्री सिंहलाई सम्मान गरेको हो ।
कार्यक्रममा कम्युनिस्ट वामपन्थी नेता गोपीरमण उपाध्यायलाई पनि मञ्चले सम्मान गरेको थियो ।
सो अवसरमा मन्तव्य राख्दै सिंहले विश्व कम्युनिस्ट आन्दोलन र नेपालको कम्युनिस्ट आन्दोलनसमेत कमजोर भएको बताउनुभयो ।
कम्युनिस्टमा सिद्धान्तमा नभई तात्कालिक कार्यनीति के बनाउने भन्ने विषयमा विवाद हुँदा फुट हुने गरेको उहाँको भनाइ थियो ।
उहाँले मार्क्सवाद वैज्ञानिक दृष्टिकोण भएकाले त्यसको गहन अध्ययनमा जोड दिनुभयो ।
कार्यक्रमको अध्यक्षता मञ्चका अध्यक्ष युवराज पन्थीले गर्नुभएको थियो ।
सो अवसरमा वरिष्ठ पत्रकार डा. बालकृष्ण चापागाईं, दिल साहनी, साहित्यकार बुँद राना, क्रान्तिकारी कम्युनिस्ट पार्टीका प्रेम सुवेदी, नेकपा (माले) का गोपालमणि गौतम, नेकपा (एमाले) का केन्द्रीय सदस्य गोमादेवी आचार्य, नेकपाका पोलिटब्युरो सदस्य बसन्त श्रेष्ठ, नेकपा (माओवादी केन्द्र) का कमल चुदालीलगायतले मन्तव्य राख्नुभएको थियो ।
कार्यक्रमको सञ्चालन पदम कार्कीले तथा स्वागत बिनबहादुर कुँवरले गर्नुभएको थियो ।
