काठमाडौँ । राष्ट्रिय जनमोर्चाका अध्यक्ष तथा प्रतिनिधिसभाका सांसद चित्रबहादुर केसीले संसार बदल्छु भन्ने पहिला आफै बदलिनुपर्ने आवश्यकता औल्याउनुभएको छ ।
अखिल नेपाल ट्रेड युनियन महासङ्घ (अन्टुक) केन्द्रीय कार्यालयद्वारा २०८२ वैशाख १८ गते बिहीबार राष्ट्रिय जनमोर्चा केन्द्रीय कार्यालयको सभाकक्षमा आयोजित एक सय छत्तिसौँ मे दिवसको कार्यक्रममा विषयवस्तु प्रस्तुत गर्दै उहाँले यस्तो अभिव्यक्ति राख्नुभएको हो ।
‘संसार बदल्छु भनेर हिँडेकाहरू नै सबैभन्दा पहिले आफू बदलिनुपर्दछ’ उहाँले अगाडि भन्नुभयो– ‘आफै नबदलिएको व्यक्तिले समाज बदल्न सक्दैन । सार कुरा यही हो ।’
मन्तव्यको क्रममा उहाँले अरू पार्टीको तुलनामा मसाल र राष्ट्रिय जनमोर्चाका नेताकार्यकर्ताहरू इमानदार रहेको टिप्पणी हुने गरेको बताउनुभयो ।
‘अरू पार्टीमा बसेर जुन खालको व्यक्तिगत स्वार्थ पूरा गर्न सकिन्छ तर मसालमा बसेर त्यस्तो गर्न सकिन्न’ अध्यक्ष केसीले यस्तो विचारका कारण आफ्नो पार्टीमा मानिसहरू नआउने गरेको बताउनुभयो ।
देशीविदेशी प्रतिक्रियावादीसित लड्न गाह्रो रहेको तर यसैमा भविष्य रहेको धारणा उहाँले व्यक्त गर्नुभयो ।
उहाँले अहिले प्रतिकूल परिस्थिति रहे पनि सधैँ यही प्रकारको अवस्था नरहने, परिस्थिति फेरिएर अनुकूलतातर्फ जाने विश्वास गर्दै त्यसका लागि धैर्यतापूर्वक तम्तयार हुनुपर्ने बताउनुभयो ।
मन्तव्यको क्रममा उहाँले देशमा देखा परेको विकृतिबारे पनि विचार व्यक्त गर्नुभयो ।
‘तपाईंहरूले संसद्भित्र ठुला ठुला तस्कर, ठेकेदार देख्नुहुन्छ’ सांसदसमेत रहनुभएको केसीले भन्नुभयो–’सहकारी हिनामिना गरेर फरार भएका दुईओटा सांसदले एकैपटक संसद् सचिवालयमा पुगेर तलब खाएका छन् ।’
यस सन्दर्भमा उहाँले पोखरा एयरपोर्ट बनाउँदा दश अर्ब रकम भ्रष्छाचार गरेको सन्दर्भ जोड्नुभयो ।
‘एउटा एयरपोर्ट बनाउन दश अर्ब सिध्याउने तर शिक्षकका लागि आठ अर्ब खर्च अप्ठ्यारो मान्ने रु’ उहाँले भन्नुभयो ।
अहिले नेपालको शिक्षाप्रणाली ध्वस्त भएकोमा चिन्तासमेत व्यक्त गर्नुभयो ।
सम्बोधनको क्रममा उहाँले प्रतिगामी खतराप्रति सचेत रहन आग्रह गर्नुभयो ।
‘हेर्दाहेर्दै गणतन्त्र गयो भने हामी फेरि रैती बन्नेछौँ’ उहाँले यस सन्दर्भमा सम्पूर्ण गणतन्त्र पक्षधर जनताको ध्यान आकर्षित हुनुपर्ने बताउनुभयो ।
