तौलिहवा । कपिलवस्तुमा अखिल नेपाल ट्रेड युनियन महासङ्घ (अन्टुक) जिल्ला समितिको आयोजनामा चन्द्रौटामा एक सय छत्तिसौँ अन्तर्राष्ट्रिय श्रमिक दिवस (मे दिवस) मनाइएको छ ।
अन्टुकका केन्द्रीय सदस्य केरसिंह अदैको प्रमुख आतिथ्यमा २०८२ वैशाख १८ गते बिहीबार सो कार्यक्रम सम्पन्न भएको हो ।
सो अवसरमा मन्तव्य राख्दै उहाँले खुल्ला अर्थनीति र उदारीकरणले देशको राष्ट्रिय पुँजीपतिलाई सङ्कटमा पारेको, उद्योग निजीकरण र ठेक्कापट्टाले मजदुरको हकअधिकार ध्वस्त बनाएको बताउनुभयो ।
मजदुरको हाजिर ठेकेदारले लगाउने हुँदा मजदुरले राज्यको श्रमऐनअनुसार सुविधा पाउनै नसक्ने उहाँको भनाइ थियो ।
कार्यक्रममा राजमो कपिलवस्तुका कोषाध्यक्ष केहरसिंह पुन, जातीय समता समाजका केन्द्रीय सदस्य खगेश्वर सुनार, रक्तिम सांस्कृतिक अभियानका केन्द्रीय सदस्य मान बहादुर नेपाली, मूल प्रवाह अखिल भारत नेपाली एकता समाजका प्रतिनिधि रामबहादुर नेपाली, अखिल नेपाल किसान महासङ्घ (अप्फा) का केन्द्रीय सदस्य श्यामप्रकाश खनाल, अखिल नेपाल जनजाति सम्मेलनका केन्द्रीय सदस्य नरबहादुर घर्ती, रक्तिम कपिलवस्तुका अध्यक्ष बेगम बुढा र अखिल नेपाल बुद्धिजीवी सङ्घ कपिलवस्तुका सदस्य छन्दबहादुर केसीले मन्तव्य राख्दै मजदुर आन्दोलनबारे धारणा राख्नुभएको थियो ।
कार्यक्रममा रक्तिमका कलाकारहरूले ‘निकाल्यौ हीरामोती’ र ‘उठ उठ भोकानाङ्गा’ गीत प्रस्तुत गर्नुभएको थियो ।
कार्यक्रममा हालै सम्पन्न स्ववियु निर्वाचनमा श्री समयथान बहुमुखी क्याम्पसबाट निर्वाचित सदस्यहरू टिना अदै र माधवी खड्कालाई सम्मान गरिएको थियो,
श्याममोहन केवटको अध्यक्षतामा अघि बढेको कार्यक्रमको सञ्चालन गोपाल केसीले तथा स्वागत रामबहादुर बुढाथोकीले गर्नुभएको थियो ।
