वीरेन्द्रनगर । प्रतिगामी खतराको विरोध गर्दै अखिल नेपाल ट्रेड युनियन महासङ्घ (अन्टुक) ले सुर्खेतमा एक सय छत्तिसौँ मे दिवस मनाएको छ ।
२०८२ वैशाख १८ गते बिहीबार राष्ट्रिय जनमोर्चा सुर्खेतको सभाहलमा गणतन्त्र र राष्ट्रियताको रक्षाका पक्षधरको बिचमा अन्तरक्रिया गर्दै सो कार्यक्रम सम्पन्न भएको हो ।
राजमो केन्द्रीय उपाध्यक्ष जनकराज शर्माको प्रमुख आतिथ्यमा सो कार्यक्रम अगाडि बढेको थियो ।
कार्यक्रमको अन्य अतिथिमा केन्द्रीय सदस्य रत्नविक्रम राना प्यासी, राजमो कर्णाली प्रदेश अध्यक्ष पूर्णबहादुर शाही, राजमो सुर्खेतका अध्यक्ष गोविन्दप्रसाद सुवेदी, नेकपा (मसाल) काठमाडौँका प्रवक्ता जगतप्रसाद रेग्मी, नेकपा (एमाले) का उपाध्यक्ष मोहन बडुवाल, नेकपा (माओवादी केन्द्र) सुर्खेतका संयोजक जितबहादुर राना, नेपाल कम्युनिस्टका सेक्रेटरी जित सी, क्रान्तिकारी कम्युनिस्ट पार्टीका रत्नबहादुर वली, नेपाली काङ्ग्रेस प्रतिनिधि शङ्कर अधिकारी, अखिल नेपाल बुद्धिजीवी सङ्घका केन्द्रीय सचिव भानुभक्त भारतीलगायतले मन्तव्य राख्नुभएको थियो ।
राजमो नेता लालबहादुर नेपालीले सङ्गठनको तर्फबाट अवधारणा वाचन गर्नुभएपछि वक्ताहरूले मन्तव्य राख्दै मे दिवस र प्रतिगमन विरुद्ध गणतन्त्र पक्षधर एक हुनुपर्ने आवश्यकतामा जोड दिनुभयो ।
अन्टुकका केन्द्रीय सदस्य तथा जिल्ला अध्यक्ष हिरालाल नेपालीको अध्यक्षता तथा लालबहादुर नेपालीको सञ्चालनमा अघि बढेको सो कार्यक्रममा हेमराज शर्माले स्वागत गर्नुभएको थियो ।
