काठमाडौँ, साउन १३ । अखिल (छैठौँ) का केन्द्रीय अध्यक्ष सुवास जिसीले शिक्षामन्त्री सस्मित पोखरेलले तत्काल राजीनामा दिनुपर्ने माग गरेका छन् । शिक्षा क्षेत्रमा लगातार देखिएका विवाद, नीतिगत अस्थिरता तथा परीक्षा व्यवस्थापनमा भएका कमजोरीको नैतिक जिम्मेवारी शिक्षामन्त्रीले लिनुपर्ने उनको भनाइ छ ।
एक भिडियो मन्तव्य सार्वजनिक गर्दै जिसीले शिक्षामन्त्री पोखरेलको कार्यकालमा एसईई र कक्षा १२ को नतिजा प्रकाशनका क्रममा गम्भीर त्रुटि भएको, प्रश्नपत्र चुहावटसम्बन्धी विवाद सिर्जना भएको तथा शिक्षा प्रशासनमा अव्यवस्था बढेको आरोप लगाए । उनले यस्तो अवस्थाले विद्यार्थी, अभिभावक र शिक्षा क्षेत्रको विश्वसनीयतामाथि गम्भीर प्रश्न उठाएको बताए।
उनका अनुसार सुशासन, पारदर्शिता र प्रणालीगत सुधारको प्रतिबद्धता जनाएको सरकारले शिक्षा क्षेत्रमा भने अपेक्षित सुधार गर्न सकेको छैन ।
जिसीले विश्वविद्यालय सुधारका नाममा विद्यार्थी संगठनमाथि प्रहार गर्न खोजिएको आरोप लगाउँदै लोकतान्त्रिक समाजमा विद्यार्थी संगठनहरू शिक्षा क्षेत्रका विकृति र विसंगतिविरुद्ध आवाज उठाउने महत्वपूर्ण माध्यम भएको बताए । विद्यार्थी संगठनलाई कमजोर बनाउने प्रयास लोकतान्त्रिक अभ्यासविपरीत रहेको उनको भनाइ छ ।
उनले भारतमा प्रवेश परीक्षा (NEET) सम्बन्धी प्रश्नपत्र चुहावट विवादपछि विद्यार्थी आन्दोलन चर्किएको र त्यसको नैतिक जिम्मेवारी वहन गर्न त्यहाँका शिक्षामन्त्रीले पद छाड्नुपरेको उदाहरण दिँदै नेपालमा पनि शिक्षा क्षेत्रमा देखिएका विवादको जिम्मेवारी शिक्षामन्त्रीले लिनुपर्ने बताए ।
त्यसैगरी, शिक्षामन्त्रीमाथि आफन्त नियुक्ति, प्रश्नपत्र चुहावटसम्बन्धी विवाद, शिक्षा नीतिमा पटक–पटक निर्णय गरेर फिर्ता लिने प्रवृत्ति तथा निजी शैक्षिक संस्थाको दबाबमा सरकारी निर्णय परिवर्तन गरेको आरोप पनि जिसीले लगाए।
विदेश अध्ययनका लागि विद्यार्थी पठाउने शैक्षिक परामर्श (कन्सल्टेन्सी) संस्थालाई नियमन गर्ने कानुन निर्माणदेखि निजी विद्यालयसँग सम्बन्धित समता शुल्कको निर्णयसम्म सरकार दबाबमा पछि हटेको भन्दै उनले यसले सरकारको निर्णय क्षमता र विश्वसनीयतामाथि प्रश्न उठाएको बताए ।
लोकसेवा आयोगको पदसंख्या व्यवस्थापनसम्बन्धी निर्णयप्रति पनि असन्तुष्टि व्यक्त गर्दै उनले वर्षौँदेखि तयारी गरिरहेका हजारौँ विद्यार्थीलाई असर पर्ने गरी सरकारले पर्याप्त तयारीबिनै निर्णय गरेको आरोप लगाए ।
शिक्षा क्षेत्रमा देखिएका पछिल्ला घटनाक्रमले सरकारको कार्यशैलीमाथि गम्भीर प्रश्न उठेको उल्लेख गर्दै जिसीले शिक्षामन्त्री सस्मित पोखरेल अब नैतिक रूपमा पदमा बसिरहन नमिल्ने दाबी गरे । उनले तत्काल राजीनामा दिएर नयाँ नेतृत्वका लागि मार्ग प्रशस्त गर्न सरकारसँग माग गरेका छन् ।
