काठमाडौँ । पूर्वप्रधानमन्त्री एवम् नेकपा (एकीकृत समाजवादी) का सम्मानित नेता झलनाथ खनालले नेकपा (माओवादी केन्द्र) अवसरवादी पार्टी भएको बताएका छन्।
२०८२ वैशाख ९ गते मङ्गलबार काठमाडौँमा आयोजित एक कार्यक्रममा बोल्दै उनले यस्तो बताएका हुन् ।
केही दिन अघिसम्म काङ्ग्रेसको पिठ्युँमा चढेर माओवादीले घमण्ड गरिरहे पनि अहिले क्रान्तिकारी कुरा गरेको खनालले टिप्पणी गरे ।
उनले काङ्ग्रेसको बुइ चढेर अहिले एमाले आगामी निर्वाचनमा पनि बहुमत ल्याउने घमण्ड गरिरहेको बताए ।
पूर्वप्रधानमन्त्री खनालले भने– ‘एउटा माओवादी पार्टी छ, जो अस्ति भर्खरसम्म काङ्ग्रेसकै पिठ्युँमा बसेर कराइरहेको थिए हाम्रा कमरेड प्रचण्ड । त्यो पिठ्युँ अहिले चिसो भएकै छैन, तातो पिठ्युँमा गएर केपी ओली बसेका छन् अनि अहिले बाहिर आएर अलिकति कुरा गर्न थालेका छन् । अलि क्रान्तिकारी कुरा गर्न थालेका छन् बाहिर आएपछि ।’
उनले थपे– ‘नेकपा एमाले भन्ने सबैभन्दा ठुलो पार्टी हामी अर्कोपटक पनि जित्छौँ, बहुमत ल्याउँछौँ भनेर घमण्ड गरिरहेको छ तर त्यो घमण्डको कुरा नेपाली काङ्ग्रेसको पिठ्युँमा बसेर बोल्छ । दलाल पुँजीपति वर्गको पार्टीको पिठ्युँमा बसेर बोल्छ । जो सुधारवादबाहेक केही पनि जान्दैन । यो घोर दक्षिणपन्थी कुरा हो ।’
नेकपा (एकीकृत समाजवादी) ले पनि मन्त्रीको लोभमा सरकारमा सहभागी भएको भन्दै यसबारेमा समीक्षा जरुरी रहेको खनालले बताए ।
उनले भने– ‘हाम्रो नै कुरा गर्दा पनि एक दुईओटा मन्त्रालय पाउँदा हामी पनि गयौँ । त्यो मन्त्रालय प्राप्त गरेर हाम्रो पार्टीले के पायो ? सबैले मूल्याङ्कन गरौँ त । यी सबैको समीक्षा गर्नुपर्छ ।’
पूर्वप्रधानमन्त्री खनालले समय लागे पनि प्रयत्न गर्दै जाने हो भने नेपालको कम्युनिस्ट आन्दोलन एकताबद्ध हुने दाबी गरे ।
