धनगढी । राष्ट्रिय जनमोर्चाका नेता हरिकृण पाण्डेका पिता मनिचन्द्र पाण्डेको स्मृतिसभा सम्पन्न भएको छ ।
२०८२ वैशाख ६ गते शनिबार कैलालीको गोदावरी–१ वनखेत अत्तरियामा सो कार्यक्रम सम्पन्न भएको हो ।
१९८६ माघ १२ गते कालीकोटको तिलागुफा–३ मा जन्मनुभएका मनिचन्द्रको गत २०८१ चैत ३१ गते निधन भएको थियो ।
शोकसभामा राजमो केन्द्रीय सदस्य तथा नन्दराज भट्ट, तराई मधेस जनवादी मोर्चाका महासचिव राजाराम चौधरी, अखिल नेपाल जनजाति सम्मेलनका केन्द्रीय सदस्य खडक रानाथारू, नेकपा (माओवादी केन्द्र) का नेता लक्षीराम आचार्य, क्रान्तिकारी कम्युनिस्ट पार्टी कैलालीका सेक्रेटरी हरिकृष्ण कठायत, जातीय समता समाज कैलालीका अध्यक्ष शेरबहादुर विक, मूल प्रवाह अखिल भारत नेपाली एकता समाजका पूर्व केन्द्रीय सदस्य झविन्द्र खनाल र अखिल नेपाल बुद्धिजीवी सङ्घ कैलालीका अध्यक्ष शोभामणि भट्टले शोकमन्तव्य राख्नुभएको थियो ।
त्यस्तै, कार्यक्रममा सुदूरपश्चिम माध्यमिक विद्यालयका प्रअ नगेन्द्रनाथ योगी, स्थानीय समाजसेवीहरू गोरखबहादुर कठायत, शालिग्राम साउद र इमानियल स्कुलका प्रिन्सिपल डा. शिवराज भट्टले पनि शोकमन्तव्य राख्नुभएको थियो ।
कार्यक्रमको अध्यक्षता छोरा हरिकृष्ण पाण्डेले तथा सञ्चालन राजमो कैलालीका जिल्ला सदस्य रामकृष्ण रेग्मीले गर्नुभएको थियो ।
कार्यक्रममा परिवारको तर्फबाट अखिल नेपाल युवक सङ्घका पूर्व अध्यक्षसमेत रहनुभएका कृष्णराज पाण्डेले मन्तव्य राख्नुभएको थियो ।
स्मृतिशेष पाण्डेको परिवारमा एक मात्र छोरा हरिकृष्ण पाण्डे, बुहारी कुन्तीदेवी पाण्डेसमेत हुनुहुन्छ ।
राजमो नेतासमेत रहनुभएका पाण्डेले यसअघि नै मृत्यु भएका आमा र हाल मृत्यु भएका बुबा दुवैको परम्परागत काजकिरिया गर्नुभएन तर किरियाखर्चबापत उहाँले स्मृतिकोष निर्माण गर्ने जानकारी दिनुभयो । त्यसका लागि जन्मस्थान कालीकोटको तिलागुमा–३ फोईस्थित महादेव उच्च माध्यमिक विद्यालयमा एक लाख रुपियाँको स्मृतिकोष स्थापना गर्ने घोषणा गर्नुभएको छ । उक्त कोषबाट प्रत्येक वर्ष जेहेन्दार विद्यार्थीलाई पुरस्कार प्रदान गरिने भएको छ ।
पाण्डेका अनुसार सो विद्यालयलाई उहाँहरूले पहिले नै जग्गादान गरिसक्नुभएको छ ।
