कुश्मा । राष्ट्रिय जनमोर्चाले सङ्घीयताको विरुद्धमा बिहादी गाउँपालिका–३ पोखराचौरमा सभा सम्पन्न गरेको छ ।
सङ्घीयता विरोधी काठमाडौँकेन्द्रित आन्दोलनको तयारीस्वरूप २०८१ चैत ९ गते शनिबार उक्त कार्यक्रम सम्पन्न भएको हो ।
कार्यक्रममा प्रमुख अतिथि राजमो केन्द्रीय सदस्य तथा गुल्मी जिल्ला अध्यक्ष रामकुमार क्षेत्री हुनुहुन्थ्यो ।
सो अवसरमा मन्तव्य राख्दै उहाँले सङ्घीयतालाई छिटोभन्दा छिटो खारेज गर्न सशक्त आन्दोलन आवश्यक रहेको बताउनुभयो ।
सङ्घीयताको नाममा देश र जनताले आर्थिक बोझ बोकिरहेको बताउँदै उहाँले राजमोले त्यसको विरुद्धमा आगामी चैत २४ देखि ३० गतेसम्म आयोजना गरेको काठमाडौँकेन्द्रित आन्दोलनमा सहभागिता तथा सहयोगका लागि अपिल गर्नुभयो ।
राजमो केन्द्रीय सदस्य तथा लुम्बनी प्रदेश सांसद तारा थापाको विशिष्ट आतिथ्यमा अघि बढेको उक्त कार्यक्रममा राजमो पर्वतका अध्यक्ष गोविन्दप्रसाद पौडेल, राजमो केन्द्रीय सदस्य तथा गुल्मी कालीगण्डकी–६ का वडाअध्यक्ष पुरन थापा र राजमो कालीगण्डकी पालिका समितिका अध्यक्ष सूर्य क्षेत्रीले पनि सम्बोधन गर्नुभएको थियो ।
राजमो बिहादी पालिका समितिका अध्यक्ष दिवाकर पराजुलीको अध्यक्षता तथा राजमो पर्वतका जिल्ला उपाध्यक्ष भीमलाल न्यौपानेको सञ्चालनमा सो कार्यक्रम अगाडि बढेको थियो ।
कार्यक्रममा पर्वत र गुल्मी जिल्लामा ठुलो सङ्ख्यामा सहभागिता रहेको थियो ।
