मन्थलीबजार । रामेछापको सदरमुकाम मन्थलीबजारमा सङ्घीयता विरुद्ध सभा सम्पन्न भएको छ ।
राष्ट्रिय जनमोर्चा बागमती प्रदेश समितिको आयोजनामा २०८१ चैत ७ गते बिहीबार सो कार्यक्रम सम्पन्न भएको हो ।
कार्यक्रममा मन्तव्य राख्दै राजमो केन्द्रीय सल्लाहकार आनन्द शर्माले सङ्घीयता देशले धान्नै नसक्ने अवस्थामा पुगेको बताउनुभयो ।
आफूहरूले अन्तरिम संविधानमा संविधानसभालाई बाइपास गरेर ल्याएदेखि नै विरोध गर्दै आएको स्मरण गर्न जनतासित आग्रह गर्नुभयो ।
सङ्घीयता कार्यान्वयनको अनुभवले यो देशले सङ्घीयता छिटोभन्दा छिटो खारेज गर्नुपर्ने महसुस भएकाले राजमोले आगामी चैत २४ देखि ३० गतेसम्म काठमाडौँकेन्द्रित अभियान सञ्चालन गर्न लागेको बताउनुभयो ।
उहाँले सो आन्दोलनमा साथ दिन सम्पूर्ण देशभक्त नेपाली जनतासित आग्रह गर्नुभयो ।
त्यस्तै, कार्यक्रमलाई सम्बोधन गर्दै राजमो केन्द्रीय सदस्य तथा बागमती प्रदेश समितिका अध्यक्ष लालबहादुर थापाले सङ्घीयताको अनावश्यक खर्च हटाउँदा शिक्षा र स्वास्थ्य क्षेत्र निःशुल्क गर्न सकिने बताउनुभयो ।
अहिले देशको शिक्षा र स्वास्थ्यको क्षेत्र अत्यन्त कमजोर रहेको स्मरण गर्दै त्यसका लागि सङ्घीयता खारेज गरी त्यसमा खर्च भइरहेको रकम यता लगाउनुपर्ने बताउनुभयो ।
उहाँले सङ्घीयता नेपाली जनताको माग नभएको पनि स्मरण गर्नुभयो ।
कार्यक्रमको अध्यक्षता राजमो रामेछापका अध्यक्ष अर्जुन थापाले तथा सञ्चालन जगत् श्रेष्ठले गर्नुभएको थियो ।
आजै राजमो बागमतीको आयोजनामा काभ्रेको भकुन्डेबेसी र सिन्धुलीको खुर्कोतमा पनि सभा सम्पन्न भएको छ ।
राजमो बागमतीका अध्यक्षसमेत रहनुभएका थापाका अनुसार भोलि दोलखाको चरिकोट र सिन्धुपाल्चोकको खाडिचौरमा सभा सम्पन्न गर्ने कार्यक्रम रहेको छ ।
पुरानोबजारमा पनि सभा
त्यस्तै, रामेछापकै पुरानोबजारमा पनि कोणसभा सम्पन्न भएको थियो ।
सभालाई अखिल नेपाल महिला सङ्घकी अध्यक्ष मीना पुन र अखिल नेपाल जनजाति सम्मेलनका अध्यक्ष निमबहादुर बुढाथोकीले सम्बोधन गर्नुभएको थियो ।
सम्बोधनका क्रममा उहाँहरूले सङ्घीयता खारेज नगर्दासम्म देशको विकास निर्माण कार्य कुण्ठित बन्दै जाने बताउनुभएको थियो ।
