काठमाडौँ । समाजवादी मोर्चा, नेपालले लोकतान्त्रिक गणतन्त्र रक्षाका लागि यही चैत १५ गते (शुक्रवार) काठमाडौँमा विशाल विरोध प्रर्दशन सहितको जनसभा गर्ने भएको छ । शनिबार (चैत २) गते) पत्रकार सम्मेलनको आयोजना गरी मोर्चाले सो जानकारी दिएको हो ।
मोर्चाले जारी गरेको वक्तव्यमा सरकारको गतिहीनताका कारण गणतन्त्रको रक्षामा चुनौती देखा परेको बताइएको छ ।
सरकारको कुशासन र अस्तव्यस्तताका कारण नेपाली जनतामा एकपछि अर्को असन्तुष्टी र आक्रोश तीब्ररुपमा बढ्दै गएको भन्दै वक्तव्यमा लोकतान्त्रिक गणतन्त्रको रक्षा, राष्ट्रको स्वाधीनता र नेपाली जनताको समाजवादको यात्रामा चुनौती देखा परेको उल्लेख छ ।
नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादीका अध्यक्ष माधवकुमार नेपाल, नेपाल कम्युनिष्ट पार्टीका महासचिव विप्लव सी र नेपाल समाजवादी पार्टीका अध्यक्ष महिन्द्र राय यादवद्वारा जारी संयुक्त वक्तव्यमा ‘सरकारको मानोमानी, देश एवम् जनताको हित विपरितका गलत क्रियाकलापका कारण जनतामा पैदा भएको असन्तुष्टिलाई धमिलो पानी बनाई गणतन्त्रका विरुद्ध राजतन्त्र पुनर्स्थापनाको षड्यन्त्रमा प्रतिगामी र पुनर्उत्थानवादी तत्वहरु लागिपरेका’ बताइएको छ ।
‘यसको सशक्त प्रतिवाद गर्नु, गणतन्त्रको रक्षा गर्नु र नेपाली विशेषताको समाजवादको दिशामा अगाडि बढ्नु वर्तमान राष्ट्रिय राजनीतिको मुख्य कार्यभार बन्न गएको छ’ वक्तव्यमा उल्लेख छ ।
