काठमाडौँ । काठमाडौँ महानगरपालिकाले राष्ट्रिय प्रजातन्त्र पार्टीलाई एक लाख रुपैयाँ जरिवाना तोकेको छ । आइतबार राजावादीको जुलुसले फोहर गरेको गरेको भन्दै महानगरले राप्रपालाई जरिवाना तोकेको हो ।
आइतबार पूर्वराजा ज्ञानेन्द्रको स्वागत गर्न राप्रपाले काठमाडौँमा जुलुस प्रदर्शन गरेको थियो । सो जुलुसले फोहरमैला गरेको तथा विरुवामा क्षति पुर्याएको भन्दै काठमाडौँ महानगरले राप्रपा केन्द्रीय कार्यालयलाई जरिवाना तोकेर पत्र पठाएको छ ।
सो पत्रमा भनिएको छ, ‘मिति २०८१ फागुन २५ गते ताहाँ पार्टी कार्यालयवाट आयोजना गरिएको कार्यक्रममा सहभागी व्यक्तिहरुबाट एयरपोर्ट, तिलगंगा गौशाला लगायत सार्वजनिक क्षेत्रका सडक, सडकपेटी तथा आईल्याण्ड र सोमा रहेका बिरुवाहरु साथै रेलिङ्गमा भौतिक क्षति र जथाभावी रुपमा फोहोरमैला समेत गरि वातावरण प्रदुषण गरेकोले तपाईलाई फोहरमैला व्यवस्थापन ऐन, २०६८, काठमाडौँ महानगरपालिका वातावरण तथा प्राकृतिक स्रोत संरक्षण ऐन, २०७७ र काठमाडौँ महानगरपालिकाको आर्थिक ऐन, २०५१ बमोजिम रु. एक लाख जरिवाना गरिएको व्यहोरा निर्देशानुसार अनुरोध गरिन्छ ।’
पूर्वराजा ज्ञानेन्द्र शाह पोखराबाट फर्किएको अवसर पारेर राजावादीहरूले आइतबार काठमाडौँमा उनको भव्य स्वागत गर्दै नाराजुलुस लगाएका थिए। जुलुस त्रिभुवन विमानस्थलबाट नाराजुलुश गर्दै निर्मल निवाससम्म पुगेको थियो।
यसअघि गत चैत २७ गते राप्रपाको प्रदर्शनबाट महानगरपालिकाको ट्राफिक आइल्याण्डमा क्षति पुगेको तथा फोहर मैला भएको भन्दै महानगरले ट्राफिक आइल्याण्ड मर्मत सम्भार गर्न रु २२२ रुपैयाँ ८१ पैसा असुल गर्ने तथा फोहरमैला व्यवस्थापन ऐन बमोजिम ५ हजार रुपैयाँ जरिवाना गराएको थियो।
यस्तै, गएको मंसिर ७ गते दरबारमार्गस्थित खुला सडकमा जागरण सभा गर्ने क्रममा सडक तथा सडकपेटीमा जथाभावी फोहरमैला गरी वातावरण प्रदूषण गरेको’ ठहर गर्दै महानगरले नेकपा (एमाले) लाई पनि एक लाख रुपैयाँ जरिवाना तोकेको थियो। यद्यपी एमालेले सो जरिवाना तिर्न अस्वीकार गरेको थियो।
