काठमाडौँ । राष्ट्रिय जनमोर्चा ललितपुरले सङ्घीयताको विरुद्धमा कोणसभा सम्पन्न गरेको छ ।
२०८१ फागुन ७ गते बुधबार ललितपुरको लगनखेलमा सो कार्यक्रम सम्पन्न भएको हो ।
सभालाई सम्बोधन गर्दै अखिल नेपाल बुद्धिजीवी सङ्घका अध्यक्ष प्राडा श्रीधर गौतमले गर्दै सङ्घीयताले देशको भलो गर्न नसक्ने बताउनुभयो ।
‘नेपालमा गरिबी हटाउनुपर्ने थियो, त्यसका लागि रोजगारी सिर्जना गर्नुपर्ने हुन्छ’ उहाँले भन्नुभयो– ॅतर सङ्घीयताले देशलाई झन् बढी आर्थिक भार बोकाउने गरेको छ ।’
उहाँले सङ्घीयता देशमा कायम रहिरहे झन् बढी कङ्गाल हुने दाबी गर्नुभयो ।
सङ्घीयताले देशको राष्ट्रियता, सार्वभौमिकता र भौगोलिक अखण्डतामाथि आँच पुऱ्याइरहेको धारणा उहाँको थियो ।
‘देशका विदेशी हस्तक्षेप बढ्दै गइरहेको छ । यसले गर्दा देशको राष्ट्रियतामाथि आँच पुगिरहेको छ’ उहाँले भन्नुभयो ।
त्यस्तै, सभालाई सम्बोधन गर्दै अखिल (छैठौं) का महासचिव पुरन पोखरेलले सङ्घीयता विदेशी इच्छाअनुसार भित्रिएको बताउनुभयो ।
‘नेपाली जनताले कहिल्यै पनि सङ्घीयता चाहियो भनेको होइनन्’ उहाँले भन्नुभयो– ‘विदेशीले षड्यन्त्रमूलक तरिकाले नेपालमा सङ्घीयता लादेका हुन् ।’
उहाँले नेपाली जनताको इच्छा र चाहना नरहेको सङ्घीयतालाई जति सकिन्छ छिटो खारेज गर्नुपर्ने आवश्यकतामा जोड दिनुभयो ।
राजमोले सङ्घीयता खारेजीका लागि चैत २४–३० गते सम्म चलाएको आन्दोलन महत्त्वपूर्ण रहेको बताउँदै उहाँले अखिल (छैठौं) ले सो आन्दोलनलाई सफल पार्न सबै प्रकारको सहयोग गर्ने प्रतिबद्धता उहाँले व्यक्त गर्नुभयो ।
राजमो केन्द्रीय सल्लाहकार नीलगोविन्द महर्जनले सभामा मन्तव्य राख्दै देशमा राजनीतिक परिवर्तन भए पनि जनताको अवस्थामा सुधार नभएको बताउनुभयो ।
‘गणतन्त्र त आयो तर नेतालाई आयो, हामीलाई केही आएन’ उहाँले अगाडि भन्नुभयो– ‘नेपाली जनता त दिनदिनै विदेश जान्छन् । त्यसमध्ये प्रत्येक दिन केहीको लास आउँछ ।’
उहाँले सङ्घीय व्यवस्थाले देशमा झन् बढी बेरोजगारी बढाइरहेको बताउनुभयो ।
महर्जनले भन्नुभयो– ‘सङ्घीयतालाई जति सकिन्छ, छिटो खारेज गर्नुपर्दछ । त्यसैले चैत २४–३० गते राजमोले आयोजना गरेको काठमाडौँकेन्द्रित आन्दोलनलाई सफल बनाउनुपर्दछ ।’
सभाको अध्यक्षता राजमो ललितपुरका कोषाध्यक्ष लालमणि बन्जाडेले र सञ्चालन राजमो बागमती प्रदेश समितिका सदस्य ईश्वरी शर्माले गर्नुभएको थियो ।
