काठमाडौँ । राष्ट्रिय जनमोर्चाका केन्द्रीय सदस्य तथा बागमती प्रदेश समितिका अध्यक्ष लालबहादुर थापाले राजमोकै कारण आत्मनिर्णयको अधिकारसहितको सङ्घीयता रोकिएको दाबी गर्नुभएको छ ।
२०८१ माघ ३० गते बुधबार काठमाडौँको कोटेश्वरमा राजमो काठमाडौँद्वारा आयोजित कोणसभालाई सम्बोधन गर्दै उहाँले सो दाबी गर्नुभएको हो ।
सभामा उहाँले भन्नुभयो– ‘राष्ट्रिय जनमोर्चाको विरोधकै कारण आत्मनिर्णयको अधिकारसहितको सङ्घीयता रोकिएको हो ।’
उहाँले यदि आत्मनिर्णयको अधिकारसहितको सङ्घीयता देशमा लागु भएको भए देश अहिलेसम्म टुक्रिसकेको हुने धारणा राख्नुभयो ।
‘राजमोले नेपाली जनताको आन्दोलनको माग विपरीत भित्राइएको सङ्घीयताको सुरुदेखि नै विरोध गर्दै आयो’ उहाँले भन्नुभयो– ‘राजमोको यस्तो विरोधकै कारण एक मधेस एक प्रदेशको माग पूरा हुन सकेन र आत्मनिर्णयको अधिकारसहितको सङ्घीयता रोकिएको हो ।’
उहाँले आत्मनिर्णयको अधिकार र एक मधेस एक प्रदेशसम्बन्धी माग पूरा भए नेपालको तराई भूभाग कुनै पनि बेला टुक्रिन सक्ने विचार व्यक्त गर्नुभयो ।
आफ्नो सङ्गठन जातिवादको पनि विरोधी रहँदै आएको उहाँले स्पष्ट पार्नुभयो ।
‘हाम्रो सङ्गठन जातजातिका हकअधिकारको पक्षमा छ तर जातिवादको पक्षमा छैन’ उहाँको भनाइ थियो ।
उहाँले राजमोले जातिवाद, क्षेत्रीयतावाद र आत्मनिर्णयको अधिकारसहितको सङ्घीयता लागु हुँदा देशको भौगोलिक अखण्डता टुक्रिने भएकाले देशलाई बचाउन आगामी चैत २४–३० गतेसम्म काठमाडौँकेन्द्रित आन्दोलन सञ्चालन गर्न थालेको बताउनुभयो ।
उहाँले सो आन्दोलनमा सहभागिताका लागि आम जनतासित अनुरोध गर्नुभयो ।
सभालाई नेकपा (मसाल) काठमाडौँका प्रवक्ता जगतप्रसाद रेग्मीले पनि सम्बोधन गर्नुभएको थियो ।
राजमो काठमाडौँका सचिव छवि खनालको सञ्चालनमा अघि बढेको सो कार्यक्रमको अध्यक्षता राजमो काठमाडौँ नगर समितिका अध्यक्ष यामलाल खनालले गर्नुभएको थियो ।
