काठमाडौँ । जिल्ला प्रहरी परिसर, काठमाडौँले सट्टाबाजीमा संलग्न रहेको आरोपमा २३ जना भारतीय नागरिकहरूलाई पक्राउ गरेको छ ।
बूढानीलकण्ठ नगरपालिका–३ गैरीगाउँस्थित दोर्जे शेर्पाको घरमा अनलाइन जुवा (३६५ लोटस) नामक जुवा खेलाई रहेको भन्ने गोप्य सूचनाको आधारमा जिल्ला प्रहरी परिसर काठमाडौँबाट तथा प्रहरी प्रभाग बूढानीलकण्ठबाट खटिएको संयुक्त प्रहरी टोली उनीहरुलाई पक्राउ गरेको हो।
पक्राउ परेका उपर सट्टाबाजी गर्न नहुने सम्बन्धी कसूरमा काठमाडौं जिल्ला अदालतबाट ५ दिन म्याद थप अनुमति लिई थप अनुसन्धान भइरहेको प्रहरीले जनाएको छ।
उनीहरूबाट बरामद भएको नोटबुकको अध्ययन गर्दा प्रतिवादीहरूले ३ अर्ब १३ करोडभन्दा बढी नेपाली रकमको कारोबार गरेको देखिएको प्रहरीको दाबी छ।
उनीहरूको मोबाइलमा ८६ लाख ९१ हजार ९७१ रुपैयाँ बराबरको क्रिप्टो करेन्सीको कारोबारसमेत भएको अनुसन्धानबाट खुलेको छ। पक्राउ परेका भारतीयका ८८ वटा मोबाइल, १० वटा ल्यापटप, भारतीय सिम ५०, भारतीय एटीएम, विभिन्न व्यक्तिको आधार कार्ड १५ थान र हिसाब(किताब विवरण भएको डायरी ७ वटा बरामद भएको छ।
यी हुन् पक्राउ परेका २३ भारतीय
वकिल कुमार यादव, किशोरी प्रसाद यादव, रोहितकुमार यादव, मुन्नाकुमार यादव, बादलकुमार जैसवाल, रावलकुमार यादव, विपिनकुमार यादव, शंकर कुमार यादव, रोहित कुमार, भवेश कुमार, अभिषेक कुमार, कुलबिन्दर सिंह, हर्ष जैसवाल, सुरज शाह, श्रेष्ठ गुप्ता, बिठ्ठु कुमार, सुनिल कुमार जैसवाल, मोहम्मद साहिद, मालिक सौरभ, खरुवा चन्दन, यादव श्याम, कुमार एस, बालकृष्ण सुरेन्द्र कुमार ।
