नयाँदिल्ली । नेकपा (मसाल) का महामन्त्री मोहनविक्रम सिंह र भारतीय वापन्थी बुद्धिजीवी आनन्दस्वरूप बर्मामाझ भेटघाट भएको छ ।
समसामयिक राष्ट्रिय/अन्तर्राष्ट्रिय परिस्थितिबारे छलफल गर्न भारतको नोएडामा २०८१ माघ २४ गते बिहीबार सो भेटघाट सम्पन्न भएको हो ।
भेटघाटमा भारतीय वामपन्थी लेखक स्वदेश सिन्हा तथा राष्ट्रिय जनमोर्चाकी उपाध्यक्ष तथा प्रवक्ता दुर्गा पौडेल, राजमो केन्द्रीय सल्लाहकार तथा वामपन्थी नेता आनन्द शर्मा, मूल प्रवाह अखिल भारत नेपाली एकता समाजका अध्यक्ष ठाकुर खनाल र केन्द्रीय सचिवालय सदस्य धनवीर पुनको पनि उपस्थिति रहेको थियो ।
भेटमा समसामयिक विश्व राजनैतिक परिस्थितिको बारेमा छलफल भएको राजमो नेता आनन्द शर्माले जानकारी दिनुभयो ।
‘छलफलको क्रममा विश्वस्तरमा बढ्दै गएको फासिवादको खतराबारे समान धारणा देखा पऱ्यो’ शर्माले युगदर्शनसित भन्नुभयो– ‘भारतको मोदी सरकारको नीति फासिवादी रहेको धारणा पनि छलफल व्यक्त भयो ।’
भेटघाटको क्रममा नेपाल तथा भारतको कम्युनिस्ट आन्दोलनमा दखा परेका विभिन्न समस्याबारे पनि छलफल भएको थियो ।
‘त्यस क्रममा मसालका महामन्त्री मोहनविक्रम सिंहले नेपालमा प्रतिगमनको खतरालगायतका विषयमा चर्चा गर्नुभएको थियो’ नेता शर्माले जानकारी दिनुभयो ।
सो अवसरमा महामन्त्री सिंहले “कामरेड जलजला” वामपन्थी बुद्धिजीवी बर्मालाई हस्तान्तरण गर्नुभएको थियो ।
