समष्टि बुढामगर ##

म यो देशको गरिब नागरिक
म श्रम गर्छु,
त्यसैले म गरिब छु
म कृषक हुँ
त्यसैले म गरिब छु
यो महँगो समाजमा
मैले आफ्नो इमान बेचिनँ
त्यसैले यो देशमा म गरिब छु

जालझेल छलकपट
मलाई केही आएन
त्यसैले म गरिब छु
म जननेता
मैले यो देशको खोला बेचिनँ
त्यसैले म गरिब छु
पुस्तौँ पुग्ने धन थुपार्न
मैले कहिल्यै लोभ गरिनँ
त्यसैले यो देशमा म गरिब छु

गास छिनी अरूको
महँगो सोख पालिनँ
त्यसैले म गरिब छु
चुनावभरि नोटको आशमा
भोट कहिल्यै बेचिनँ
त्यसैले म गरिब छु
ऋण लिएर पढेको मँ
नियुक्तिमा घुस दिन सकिनँ
त्यसैले यो देशमा म गरिब छु

यो देश यस्तै गरिबीले भरिएको छ
यहाँ मान्छे मात्र होइन
खोला गरिब छन्, कञ्चन हुनमा
खेतबारी गरिब छन्, पसिनाको सवालमा
गाउँबस्ती गरिब छन्, युवाको खाँचोमा
सिङ्गो राष्ट्र गरिब छ, सच्चा देशभक्तको अभावमा
जता हेऱ्यो उतै छ
धनी भएर पनि मेरो देश गरिब छ

यस्ता गरिबी हट्नैपर्छ हाम्रो देश बाच्न
मात्रै हटाउन यसलाई
परिवर्तनको भेल आउन जरुरी छ
इमानदारीताको सन्देश बोकी
बिगुल फुक्न जरुरी छ
बाँधिएका हात उचाली
मुठ्ठी कस्न जरुरी छ
जरुरी छ सङ्घर्ष गर्न
अनि मात्र पर्ने छैन यहाँ
कसैलाई गरिब भई बस्न