दिपायल । डोटीको केआईसिंह गाउँपालिकामा राष्ट्रिय जनमोर्चाको भेला सम्पन्न भएको छ ।
जिल्ला अध्यक्ष डबल बोगटीको प्रमुख आतिथ्यमा २०८१ माघ १७ गते बिहीबार बायलमा सो कार्यक्रम सम्पन्न भएको हो ।
सो अवसरमा मन्तव्य राख्दै उहाँले सङ्घीयता खारेज नगर्दासम्म देशमा बेथिती बढ्दै जाने बताउनुभयो ।
उहाँले देशको राष्ट्रियता, सार्वभौमिकता र भौगोलिक अखण्डतामाथि नै सङ्घीयताद्वारा आँच पुगिरहेको धारणा व्यक्त गर्नुभयो ।
राजमोले नेपालमा सङ्घीयता अनुचित व्यवस्था भएको ठहर गरेरै आगामी चैत २४ देखि ३० गतेसम्म राजधानीकेन्द्रित आन्दोलन आयोजना गरेकाले त्यसमा सहयोग, सहभागिता र समर्थन गर्न सबैसित आग्रह गर्नुभयो ।
भेलामा राजमो डोटीका उपाध्यक्ष रमेश अवस्थी, सचिव मानबहादुर खड्का, अखिल नेपाल जनजाति सम्मेलनका कृष्ण पुन, अखिल नेपाल युवक सङ्घ डोटीका शङ्कर विक र इन्द्र विष्ट, अखिल नेपाल महिला सङ्घकी पार्वती विक र निर्मला बोगटी, राजमो नेताहरू रामचन्द्र भट्ट, लालबहादुर बिडारी, डम्मर नेपाली, रतनसिंह कार्की, ईश्वर धामी, नारायण भुललगायतका नेताहरूको आतिथ्य रहेको थियो ।
हेमराज भट्टको सञ्चालन तथा कविराज जोशीको अध्यक्षतामा उक्त कार्यक्रम अघि बढेको थियो ।
