काठमाडौं । राष्ट्रिय स्वतन्त्र पार्टी (रास्वपा) की केन्द्रीय सदस्य ज्वाला संग्रौलाले आफ्नो पार्टीका नेताहरू कुनै न कुनै काण्डमा मुछिएको बताएकी छन् ।
मंगलबार सामाजिक सञ्जालमा आक्रोश पोख्दै संग्रौलाले यस्तो अभिव्यक्ति दिएकी हुन्।
बेलामौकामा विवादित अभिव्यक्ति दिँदै आइरहेकी संग्रौलाको पार्टीभित्रै आलोचना भएपछि उनले सामाजिक सञ्जालमा लेखेकी छन्, ‘ज जसले आज मेरो विरोध गरेर म रास्वपा हुँ भनिरहेका छन्, तिनिहरूको बिगत खोज्दै जाने हो भने एउटा न एउटा काण्डमा मुछिएकै छन् ।’
केहीदिन अघि संग्रौलाले सहकारी ठगी प्रकरणमा मुछिएका सभापति रवि लामिछाने गृहमन्त्री हुँदा बलात्कारको मुद्दामा ‘जीवनदान’ दिएको व्यक्ति अहिले निकै नै उफ्रिरहेको अभिव्यक्ति दिएकी थिइन् ।
उनको यो भनाइ एमाले नेता महेश बस्नेततिर थियो । बस्नेतलाई शोभा पाठकले बलात्कार आरोप लगाइरहेकी छन् ।
सरकारले बस्नेतलाई जोगाएको भन्दै शोभा माइतीघरमण्डलमा धर्नासमेत बसिसकेकी छन् । तर उनले बस्नेतविरुद्ध दिएको जाहेरी दर्ता भएर अहिलेसम्म मुद्दा अघि बढेको छैन ।
लामिछाने गृहमन्त्री हुँदा महेश बस्नेतलाई बलात्कार मुद्दामा जोगाएको भनेर अभिव्यक्ति दिएपछि आलोचना खेपेकी ज्वालाले मंगलबार आफ्नै पार्टीका नेताहरूविरुद्ध अभिव्यक्ति दिएकी हुन् ।
नेताहरू कुनै न कुनै काण्डमा मुछिएको बताउँदै उनले अगाडि लेखेकी छन्, ‘मैले पर्दाफास गर्दै गएँ भने भोलि नाकमुख देखाउन गाह्रो होला महोदय ।’
यसअघि पनि उनले सामाजिक सञ्जालमै ‘अरु त त्यस्तै हो पार्टीको चुनावी अभियानका दौरान आर्थिक अपचलन गरेर निलम्बनमा परेका ‘भूतपूर्व’हरूले मेरो खेदो गरेको चाहिँ कतिपनि सुहाएन’ भन्दै आफ्नै पार्टीका नेताहरूमाथि कटाक्ष गरेकी थिइन्।
केन्द्रीय सदस्य संग्रौलाले आफूले केही दिनअघि दिएको अभिव्यक्तिको विषयमा पार्टीको अनुशासन समितिले स्पष्टीकरण सोधे जुनसुकै ठाउँमा उभिएर जवाफ दिन तयार रहेको पनि बताएकी छन् ।
‘मेरो अभिव्यक्तिको विषयमा मलाई पार्टीको केन्द्रीय अनुशासन समितिले स्पष्टीकरण सोधेमा म जुनसुकै ठाउँमा उभिएर भए पनि जवाफ दिन तयार छु,’ उनले भनेकी छन् ।
