हेम बिजी ##

म
जुध्दै जुध्दै
ज्वारभाटा विरुद्ध बढ्ने छु
आओस् तुफान
सतिसाल बनेर उभिने छु
र हुरीमा पनि
बनेर दियो
अन्धकार रात चिर्ने छु
यो
प्रवासका गल्ली गल्लीमा
प्रवासका बस्ती बस्तीमा

मलाई
सुम्पिएको छ गहन जिम्मेवारी
त्यसैले
जित्ने छु हार्ने छैन हारसँग
मलाई
दिईएको छ भुल्नै नहुने भूमिका
त्यसैले
निभाउनु छु कठोर कर्तव्य
र मलाई
आएको छ महान अभिभारा
त्यसैले
पार्ने छु सफल
अगाडि अगाडि बढेर अविश्राम

म
लम्किरहने छु मेरो लक्ष्यमा
उत्साहित भइरहने छु मेरो उद्देश्यमा
किनकि
भारतस्थित प्रवासी नेपालीहरू
जसलाई म
अधिकार दिलाउने मेरो लक्ष्य हो
अन्याय अन्त्य गर्ने मेरो उद्देश्य हो
त्यसैले
मेरो यात्रामा
कुनै बाधाले मलाई बाँध्न सक्ने छैन
कुनै अवरोधले अल्मल्याउन सक्ने छैन

मैले
खाएको छु शपथ
हजारौँहजार जनतामाझ
मुठ्ठी उठाएर
मूल प्रवाह ब्यानरमुनि उभिएर
खाएको छु कसम
निधारमा कफन बाँधेर
र मेरो
यात्राको गन्तव्य
घोषणापत्रले लेखिदिएको छ
मेरो यात्राको परिधि
विधानले बोलिदिएको छ
त्यसैले
घोषणापत्र र विधान विरुद्ध चल्ने छैन म
हजारौ चुनौती आउन तर ढल्ने छैन म
यसरी
शपथ खाएका थिए
नवनिर्वाचित सदस्यहरू
नव निर्वाचित पदाधिकारीहरू