दाङ । राष्ट्रिय जनमोर्चाका लुम्बिनी प्रदेश सल्लाहकार सुरेश थापाले सङ्घीयता असफल प्रमाणित भइसकेको दाबी गर्नुभएको छ ।
राजमो गढवाद्वारा २०८१ माघ १२ गते शनिबार आयोजित अन्तरक्रियामा प्रमुख अतिथिको आसनबाट बोल्दै उहाँले सो दाबी गर्नुभएको हो ।
“सङ्घीयताले उत्पन्न सङ्कट र त्यसका विरुद्धको राजधानीकेन्द्रित आन्दोलनको प्रश्न” विषयक सो कार्यक्रममा पार्टीको धारणा राख्दै उहाँले सङ्घीयता खारेजीका लागि चैत २४ देखि काठमाडौँकेन्द्रित आन्दोलन गर्नुपरेको उहाँले स्पष्ट पार्नुभयो ।
‘राष्ट्रिय जनमोर्चाले नेपालमा सङ्घीयता भित्राइएदेखि नै त्यसको विरुद्ध निरन्तर सङ्घर्ष गरेका कारण देश जातीय राज्यमा जानबाट जोगिएको, धेरै प्रदेश बन्नबाट जोगिएको, एक मधेस एक प्रदेश बन्नबाट जोगिएको, आत्मनिर्णयको अधिकारका कारण राष्ट्रिय विखण्डन हुनबाट जोगिएको छ’ उहाँले भन्नुभयो– ‘अब सङ्घीयताको खारेजीका लागि हामीले पुनः आन्दोलन गर्न थालेका छौँ ।’
उहाँले अब पनि सङ्घीयतालाई खारेज गर्न नसक्ने हो भने देश ठुलो समस्यामा पर्ने उहाँको भनाइ थियो ।
कार्यक्रमलाई सम्बोधन गर्दै राजमो केन्द्रीय सदस्य तथा दाङ जिल्ला अध्यक्ष गणेश आचार्यले कार्यक्रमको विषयप्रवेश गराउदै विश्वव्यापी रूपमा अपनाइएको सङ्घीयताको सिद्धान्तसित नेपाली सङ्घीयताको कुनै मेल नखाएको बताउनुभयो ।
नेपालको सङ्घीयता व्यावहारिक मात्र नभएर सैद्धान्तिक रूपमा पनि गलत भएको उहाँको दाबी थियो ।
नेपालमा कुनै आधारमा पनि सङ्घीयता सही नभएको सबैले बुझेको हुनाले चैत २४ देखिको आन्दोलन सफल हुने विश्वास उहाँको थियो ।
‘प्रदेशलाई पाल्दा सम्पूर्ण राज्यकोष समाप्त भएको, सरकार विकास, उत्पादन र रोजगारीमा लगानी गर्न नसकिएका कारण युवामा निराशा र पलायनको भावना वृद्धि भएको छ’ उहाँले भन्नुभयो ।
राजमो गढवा पालिका अध्यक्ष कपिलदेव खनालको अध्यक्षतामा अघि बढेको उक्त कार्यक्रममा अखिल नेपाल शिक्षक सङ्घका केन्द्रीय सदस्य लालबहादुर भण्डारी, जनता समाजवादी पार्टीका पालिका अध्यक्ष महबुब अली, नागरिक समाज गढवाका अध्यक्ष खगेश्वर शर्मालगायत सबैले सङ्घीयता नेपालका लागि सही नभएको, यो केवल कार्यकर्ता पाल्ने थलो मात्र भएको बताउनु भएको थियोे ।
जिल्ला सदस्य दीनमणि आचार्यको स्वागत मन्तव्यबाट सुरु भएको कार्यक्रमको सहजीकरण राजमो पालिका सचिव टुकमान कुँवरले गर्नु भएको थियोे ।
