दिनेस रैदास, दाङ ।
देउखुरी उद्योग वाणिज्य सङ्घले सातौँ देउखुरी महोत्सवको जानकारी दिन पत्रकार सम्मेलन सम्पन्न गरेको छ ।
२०८१ माघ ९ गते सो कार्यक्रम सम्पन्न भएको हो ।
सातौँ देउखुरी कृषि, पर्यटन तथा व्यापारिक महोत्सव–२०८१ को लुम्बिनी प्रदेशका पर्यटन, उद्योग तथा यातायातमन्त्री प्रचण्डविक्रम न्यौपानेले माघ १० गते बिहीबार उदघाटन गर्ने आयोजकले बताएको छ ।
सङ्घका अध्यक्ष तथा महोत्सव मूल आयोजक समिति संयोजक कमलजङ्ग सिंह ठकुरीले “पर्यटन, उद्योग, कृषि र व्यापार, राष्ट्रिय समृद्धिको आधार” भन्ने मूल नाराका साथ २०८१ माघ १० देखि २७ गतेसम्म महोत्सव सञ्चालन हुने जानकारी दिनुभयो ।
महोत्सवमा विभिन्न सेवा तथा वस्तुका तीन सय स्टल रहने, लमहीलाई पर्यटकीय, औद्योगिक तथा व्यापारिक केन्द्रको रूपमा विस्तार गर्न यस क्षेत्रको विभिन्न जाति तथा समुदायको कला संस्कृतिको संरक्षण गर्दै देशको आन्तरिक र बाह्य पर्यटन प्रवर्द्धन गर्ने, विभिन्न जिल्लाका मौलिक तथा विशिष्टता पहिचान भएको वस्तु तथा उत्पादनको प्रदर्शनी तथा प्रवर्द्धन गर्ने मुख्य उद्देश्य रहेको पनि कार्यक्रममा जानकारी दिइयो ।
सङ्घका कोषाध्यक्ष हरि थापाले तीन सय स्टलमध्ये पचासओटा स्टल कृषि व्यवसायीलाई निःशुल्क उपलब्ध गराएको र उत्कृष्ट हुनेलाई पचास हजार र दोस्रो हुनेलाई पच्चिस हजार रुपैयाँ पुरस्कार दिइने घोषणा गर्नुभयो ।
महोत्सवलाई सफल र सार्थक बनाउन आयोजक र उद्योग वाणिज्य सङ्घको मात्र नभएर यस क्षेत्रका स्थानीयवासीको महत्त्वपूर्ण भूमिका रहने तथा महोत्सवको अवलोकन गर्नका लागि उत्साहित बनाउने वातावरण तयार गरी महोत्सवमा भएका गतिविधिलाई उजागर गरिदिन सञ्चारकर्मीसित आजोजकले अनुरोध गरेको थियो ।
