कावासोती । राष्ट्रिय जनमोर्चाले नवलपुरमा सङ्घीयताको मृत्यु भएको घोषणा गर्दै शङ्ख फुक्ने (शङ्खध्वनि) कार्यक्रम तय गरेको छ ।

राष्ट्रिय जनमोर्चाका नेता कृष्ण अधिकारीको प्रमुख आतिथ्यमा २०८१ माघ ७ गते सोमबार सम्पन्न भेलास्तरीय भेलाले सो कार्यक्रम तय गरेको हो ।

भेलाद्वारा पारित कार्यक्रमअनुसार सङ्घीयता विरोधी काठमाडौँकेन्द्रित आन्दोलनको तयारीस्वरूप आगामी चैत ८ गते शङ्खध्वनि कार्यक्रम सम्पन्न गरिने छ ।

भेलाले माघदेखि चैतसम्म काठमाडौँकेन्द्रित आन्दोलनको तयारीस्वरूप विभिन्न कार्यक्रम निश्चित गरेको छ ।

सो क्रममा माघ १२ गते विनयत्रिवेणीमा, माघ १४ गते हुप्सेकोटमा, माघ १६ गते मध्यविन्दुमा, माघ १८ गते देवचुलीमा र माघ २० गते गैँडाकोटमा भेला तथा कोणसभाको कार्यक्रम तय गरिएको छ ।

भेलाले माघ १० देखि चैत २३ गतेसम्म जनभेटघाटका साथै आर्थिक सङ्कलनको कार्यक्रम तय गरेको छ ।

त्यस्तै, माघ २८ गते कावासोतीमा पत्रकार सम्मेलन गरिने छ भने माघ २० देखि फागुन २० गतेसम्म वालपेन्टिङ कार्यक्रम तय गरिएको छ ।

त्यसैगरी फागुन २५ गते जिल्ला प्रशासन कार्यालय नवलपुरमा धर्ना बस्नु, ज्ञापनपत्र बुझाउनुका साथै कोणसभा पनि सम्पन्न गर्ने कार्यक्रम रहेको छ ।

चैत १ देखि ५ गतेसम्म जिल्लाव्यापी मोटरसाइकिल जुलुस, डौडजुलुस र सिट्ठी जुलुसको कार्यक्रम तय गरिएको छ ।

त्यस्तै, चैत १० देखि १४ गतेसम्म प्रचारप्रसारस्वरूप माइकिङ कार्यक्रम सम्पन्न गरिने छ भने चैत १४ देखि २३ गतेसम्म काठमाडौँ पुग्न आवश्यक तयारी गरिने छ ।

भेलामा राजमो केन्द्रीय सदस्य भागिरथ भट्टराई र दीपक पाण्डे, अखिल नेपाल ट्रेड युनियन महासङ्घ (अन्टुक) का महासचिव शालिकराम सापकोटा, अखिल नेपाल किसान महासङ्घ (अप्फा) का महासचिव तुलसी सापकोटा, मूल प्रवाह अखिल भारत नेपाली एकता समाजका सचिव प्रेम सापकोटा, जातीय समता समाजका केन्द्रीय सदस्य लक्ष्मी विक, तराई मधेस जनवादी मोर्चाका केन्द्रीय सदस्य रूपनारायण महतो र नेकपा (मसाल) नवलपुरका प्रवक्ता चन्द्र सापकोटाले मन्तव्य राख्नुभएको थियो ।

कार्यक्रममा अखिल नेपाल युवक सङ्घका केन्द्रीय सदस्य धनबहादुर सुर्पाकमगर, रक्तिम सांस्कृतिक अभियानका गण्डकी प्रदेश अध्यक्ष भक्तबहादुर उचई, अखिल नेपाल जनजाति सम्मेलन नवलपुरका अध्यक्ष विकाराम चौधरी, राजमो चितवनका गोविन्द लामिछाने, मूल प्रवाहकी सीता सापकोटा, राजमो कावासोतीका धनपति अधिकारी र राजमो हुप्सेकोटका मानबहादुर लामाको आतिथ्य रहेको थियो ।

कार्यक्रमको अध्यक्षता राजमो जिल्ला अध्यक्ष गिरबहादुर महतारा, सञ्चालन टेकराज पौडेलले र स्वागत होमनाथ पराजुलीले गर्नुभएको थियो ।