काठमाडौँ । संसदको सार्वजनिक लेखा समितिमा ९६ वटा उजुरी परेका छन् ।

समितिमा अघिल्लो आर्थिक वर्ष र यो आर्थिक वर्षमा गरी ९६ वटा उजुरी परेको समिति सचिवालयले जानकारी दिएको छ ।

सचिवालय स्रोतका अनुसार समितिमा विशेषगरी वित्तीय सुशासन र आर्थिक अनुशासनसँग सम्बन्धीत उजुरीहरू आउने गरेका छन्।

समितिमा आएका उजुरीका सम्बन्धमा छलफल गर्न मंगलबार समितिको बैठक बोलाइएको छ । समिति सभापति ऋषिकेश पोखरेलले मंगलबार बिहान ११ बजेका लागि बैठक बोलाएका हुन् ।

मंगलबारको बैठकमा समितिमा आएको उजुरीसँगै उपसमितिहरूले समितिमा छलफल गर्ने भनी औंल्याएका विषयमा पनि छलफल गर्ने कार्यसूची रहेको छ ।

उपसमितिले टुङ्ग्याउन नसकेका विभिन्न मन्त्रालयसँग सम्बन्धित बेरूजुका बुँदाहरू समितिमा छलफल हुन लागेको हो ।