बागलुङबजार । राष्ट्रिय जनमोर्चाका अध्यक्ष तथा प्रतिनिधिसभाका सांसद चित्रबहादुर केसीले सङ्घीयताका कारण मुलुक असफल देश बन्ने खतरा उत्पन्न भएको धारणा व्यक्त गर्नुभएको हो ।

सङ्घीयता विरोधी काठमाडौँकेन्द्रित आन्दोलनको तयारीस्वरूप २०८१ माघ ५ गते शनिबार बागलुङको गल्कोट हटियाबजारमा आयोजित सभालाई मन्तव्य व्यक्त गर्दै उहाँले सो अभिव्यक्ति दिनुभएको हो ।

प्रमुख अतिथि अध्यक्ष केसीले नेपाली जनताले धान्न नसक्ने सङ्घीयताले मुलुक अस्तव्यस्त नै भएको बताउनुभयो ।

‘व्यापारघाटा २५ खर्बभन्दा बढेर गएकाले मुलुक असफल देश बन्ने खतरामा छ’ उहाँको निष्कर्ष थियो ।

एउटा सरकार चलाउन गाऱ्हो भएका बेला आठरआठओटा सरकार चलाउन नसकिने बताउँदै उहाँले विदेशीले बोकाइदिएको सङ्घीयताको भारी अब मुलुकले धान्न नसक्ने बताउनुभयो ।

‘सङ्घीयता खारेजीको विकल्प छैन’ सम्बोधनको क्रममा उहाँले भन्नुभयो ।

भ्रष्टाचार यसरी बढ्नुमा ठुला राजनैतिक पार्टीका नेताहरू नै हात रहेको बताउँदै उहाँले नेपाली नागरिकलाई भुटानी बनाएर बिक्री गर्ने, सहकारी ठगी, सुनकाण्ड, सरकारी जग्गा आफ्नो नाममा पास गर्नेजस्ता घृणित कार्य सरकार सञ्चालकबाट भएकोले राजनीति बद्नाम भएको बताउनुभयो ।

राज्यले आशा जगाउन नसक्नु, शिक्षा, स्वास्थ्यजस्तो नागरिकको प्रत्यक्ष सरोकारका विषय निजीकरण गर्नु, कलकारखाना कौडीको भाउमा निजीकरण गरी रोजगारीबाट वञ्चित गर्नुले झन् गम्भीर अवस्था सृजना भएको बताउँदै उहाँले सङ्घीयता खारेजीका लागि राष्ट्रिय जनमोर्चाले आह्वान गरेको सङ्घीयता खारेजीका लागि काठमाडौँकेन्द्रित आन्दोलनलाई सफल पार्न आग्रह गर्नुभयो ।

राष्ट्रिय जनमोर्चा बागलुङले “गणतन्त्र र राष्ट्रियताको रक्षा गरौँ, सङ्घीयता खारेजीका लागि काठमाडौँकेन्द्रित आन्दोलन सफल पारौँ” नारासहित अघि बढेको सभामा राजामो केन्द्र्रीय सदस्य बेदीलाल सापकोटा, राजमो बागलुङका अध्यक्ष तिलक थापा, अखिल नेपाल महिला सङ्घकी केन्द्र्रीय उपाध्यक्ष लक्ष्मी बास्कोटा र अखिल नेपाल बुद्धिजीवी सङ्घका काजीगाउँले श्रेष्ठलगायतका अतिथिले मन्तव्य राख्नुभएको थियो ।

कार्यक्रममा राजमो केन्द्र्रीय सल्लाहकार तथा जिल्ला समन्वय समिति बागलुङका प्रमुख अमर थापा, राजमो केन्द्र्रीय सदस्य गौरिश्वर पाण्डे, राजमो बागलुङका जिल्ला सदस्य, जनवर्गीय सङ्गठनका केन्द्र्र तथा जिल्लास्तरीय नेता तथा पालिकास्तरीय अतिथिको आतिथ्य रहेको थियो ।

राजमो गलकोटका नगर अध्यक्ष तथा जिल्ला सल्लाहकार टङ्क केसीको अध्यक्षता, जिल्ला सचिव भीमलाल पोखरेलको सञ्चालन र जिल्ला सदस्य तथा नगर सचिव पदम श्रेष्ठको स्वागत मन्तव्यसँगै उक्त सभा अघि बढेको थियो ।

कार्यक्रममा रक्तिम सांस्कृतिक परिवारका कलाकारको प्रस्तुति रहेको थियो ।