महेन्द्रनगर । भारतका विभिन्न शहरबाट काम गरेर फर्किएका नेपालीले आज पश्चिमी सिमाक्षेत्र बनबासामा नाराबाजी गरेका छन् । कोरोना भाइरसको प्रभावले भारतमा रोजगारी गुमाएपछि स्वदेश फर्किन सीमा नाका सम्म पुगेका मजदुरहरु सीमा नजिकै पुगेर पनि नेपाल प्रवेश गर्न नपाएको भन्दै उनीहरु आक्रोशित भएका हुन् ।
सयौंको संख्यामा जम्मा भएका नेपालीले सिमानाका खोल्न माग गर्दै नाराबाजी गरेपछि भारतीय प्रहरीले उनीहरुलाई सम्झाईबुझाई गरेको थियो । त्यहाँ जम्मा भएका मजदुरहरुलाई भारतीय प्रशासनले खानपिनको व्यवस्था गरेको भारतीय पत्रकार दीपक फुलेराले जनाएका छन् ।
लकडाउनका कारण सीमा बन्द भएपछि सयौं नेपाली सीमा क्षेत्रमा अलपत्र पर्ने गरेका छन् । तर, पछिल्लो समय नेपालीको दबाब बढ्दै जाँदा स्थानीय तहहरुले नेपालीलाई घर भित्राउन थालेका छन् ।
गौरीफन्टाबाट दुई हजार भित्रिए
यता कैलालीको सिमानाका गौरिफन्टाबाट आज दुई हजार नेपाली भित्रिएका छन् । साँझ सात बजेसम्म दुई हजारलाई भित्र्याईएको जिल्ला प्रशासन कार्यालय कैलालीले जनाएको छ । अझै उद्धारको क्रम जारी छ ।
बुधबार उनीहरुको सामान्य तापक्रम परीक्षण गरेर भित्र्याईएकोमा आज भने सीमानाकामै र्यापिड टेस्ट गरिएको छ । जसमा ११ जनामा कोरोना पोजेटिभ देखिएको छ । यद्यपी र्यापिड टेस्टप्रति भने स्वास्थ्यकर्मी नै विश्स्त छैनन । सुदूरपश्चिम प्रदेश सरकारले सीमा क्षेत्रमै र्यापिड टेस्ट गर्ने व्यवस्था मिलाएको जिल्ला प्रशासन कार्यालय कैलालीले जनाएको छ।
सुदूरपश्चिममा ३५ दिनयता कोरोना संक्रमित शून्य
सुदूरपश्चिम प्रदेशमा पछिल्ला ३५ दिनयता कोरोना भाइरस संक्रमित फेला परेका छैनन् । देशका विभिन्न जिल्लामा पछिल्ला केही दिनयता कोभिड–१९ का संक्रमितको संख्या दिनहुँ बढी रहे पनि सुदूरपश्चिममा भने सो अवधिमा संक्रमित फेला नपरेका क्षेत्रीय स्वास्थ्य सेवा निर्देशनालय दिपायल राजपुरले जनाएको छ ।
संक्रमित फेला नपरे पनि पछिल्लो समय भारतबाट सुदूरपश्चिमका विभिन्न नाकाबाट भित्रिन लागेका नागरिकका कारण कोरोनाको उच्च जोखिममा रहेको स्वास्थ्यकर्मी बताउँछन् ।
प्रदेशमा गत चैत १४ गते कोरोना भाइरस संक्रमणको पहिलो घटना फेला परेको थियो । त्यसपछि पाँच जना कोरोना संक्रमित देखिएकामा सबै निको भएर घर फर्किसकेका छन् । कोरोना संक्रमितको उपचारका लागि यहाँको सेती प्रादेशिक अस्पताल कैलालीलाई कोरोना ‘डेडिकेटेड’ अस्पतालका रुपमा सञ्चालन गरिएको छ ।
सुदूरपश्चिमका विभिन्न जिल्लामा एक हजार ६७९ जना क्वारेन्टिनमा रहेका र १३ जनालाई आइसोलेसनमा राखिएको छ । जसमध्ये सेती प्रादेशिक अस्पतालमा तीन, टीकापुरमा चार, बझाङमा एक, डोटीमा एक, बाजुरामा तीन र डडेल्धुरामा एक जनालाई आइसोलेसनमा राखिएका छन् ।
