काठमाडौँ । अखिल नेपाल किसान महासङ्घ (अप्फा) को राष्ट्रिय भेला आगामी माघ २५ गते बुटवलमा हुने भएको छ ।
अध्यक्ष भैरवराज रेग्मीद्वारा २०८१ पुस २५ गते बिहीबार जारी प्रेसविज्ञप्तिमा सो जानकारी दिइएको हो ।
उहाँले पुस २४ गते बुटवलमा सम्पन्न सचिवालय बैठकले निर्णय गर्न सो प्रेसविज्ञप्ति जारी गरिएको पनि बताउनुभएको छ ।
प्रेसविज्ञप्तिमा आगामी चैत २४ देखि ३० गतेसम्म राष्ट्रिय जनमोर्चाले घोषणा गरेको सङ्घीयता खारेजीका लागि काठमाडौँकेन्द्रित आन्दोलनमा सहयोग र सहभागिता जनाउने, आगामी बजेटमा किसान र कृषिलाई ध्यान दिइनुपर्ने र मलको कृत्रिम अभाव बन्द गर्नुपर्ने उल्लेख छ ।
त्यस्तै, अप्फाका केन्द्रीय उपाध्यक्ष चन्द्रबहादुर केसी घाँटीको समस्याले उपचाररत रहनुभएकोमा सहयोगको अपिल गरिएको छ ।
विज्ञप्तिमा प्यालेस्टाइन, रुस–युक्रेन युद्ध र सिरियामा अमेरिकी हस्तक्षेपको पनि विरोध गरिएको छ ।
यस्तो छ, प्रेसविज्ञप्तिको पूर्ण पाठ :
“अखिल नेपाल किसान महासङ्घ (अप्फा) को केन्द्रीय सचिवालय बैठक अध्यक्ष भैरवराज रेग्मीको अध्यक्षतामा २०८१ पुस २४ गते बुटवलमा सम्पन्न भएको छ । बैठकले यही माघ २५ गते बुटवलमा राष्ट्रिय भेला गर्ने निर्णय गरेको छ ।
बैठकले राष्ट्रिय जनमोर्चाको आगामी चैत २४ देखि ३० गतेसम्म सङ्घीयता खारेजीका लागि काठमाडौँकेन्द्रित आन्दोलनलाई सक्रिय भौतिक तथा आर्थिक सहयोग गर्दै सहभागी हुने निर्णय गरेको छ ।
बैठकले प्यालेस्टाइनका जनतामाथि अमेरिकी साम्राज्यवादको नेतृत्वमा इजरायलले गरेको नरसंहारको भर्त्सना गरेको छ । प्यालेस्टाइनीको राज्यमाथि कब्जा गर्ने इजरायली विस्तारवादको कडा विरोध गरेको छ । त्यसका साथै सिरियामा भएको अमेरिकी साम्राज्यवादको हस्तक्षेपको विरोध गर्दै रुस–युक्रेनको लडाइँ तुरुन्त बन्द हुनुपर्ने र अमेरिकी साम्राज्यवादको प्रत्यक्ष निर्देशनमा युक्रेनलाई उक्साएर गरिएको साम्राज्यवादी युद्ध बन्द गर्न माग गर्दछ ।
बैठकले युरोपीय देशमा किसान र उनीहरूको उत्पादनमाथि बहुराष्ट्रिय कम्पनीको हस्तक्षेप विरुद्धको सङ्घर्षप्रति ऐक्यबद्धता प्रकट गरेको छ ।
देशमा सङ्घीय र स्थानीय सरकारले आगामी बजेटमा छलफल अगाडि बढाइरहेका छन् । त्यसमा किसान र कृषिलाई प्राथमिकतामा राखेर कृषि क्षेत्रको बजेट वृद्धि गर्न माग गरेको छ । सरकारले मल भित्राए पनि सरकारी संयन्त्र र विचौलियाले मलको कृत्रिम अभाव सिर्जना गरी मलमा ब्रह्मलुट गर्ने काम बन्द गर्नुपर्ने माग गरेको छ ।
अप्फाका उपाध्यक्ष चन्द्रबहादुर केसी घाटीमा समस्या भई बोली बन्द भएकाले भरतपुर क्यान्सर अस्पतालमा उपचारमा हुनुहुन्छ । उहाँका शीघ्र स्वास्थ्यलाभको कामनासमेत बैठकले गरेको छ । उहाँको उपचारका लागि सङ्गठनका सबै तहबाट आर्थिक सहयोग गर्न पनि अपिल गर्दछ ।”
