काठमाडौैं । मोरङको उमागौरी कृषि सहकारीको बचत हिनामिनाको अभियोग लागेकी अञ्जला कोइराला अदालतमा हाजिर भएकै दिन धरौटीमा रिहा भएकी छन् ।
प्रतिनिधि सभाअन्तर्गत सार्वजनिक लेखा समितिका सभापति ऋषिकेश पोखरेलकी पत्नी अञ्जला १० लाख धरौटी बुझाएर रिहा भएकी हुन् ।
फरार सूचीमा रहेकी कोइराला बुधबार बिहान अदालतमा हाजिर भएकी थिइन् । जिल्ला अदालत मोरङका न्यायाधीश उद्धवप्रसाद भट्टराईको इजलासले बुधबार नै बयान सकेर थुनछेक आदेश गरेको हो ।
बयानमा अन्जलाले सहकारीको रकम अपचलनमा आफ्नो संलग्नता अस्वीकार गरेकी छन्। सहकारीको सञ्चालक समिति सदस्य पदमा रहेकी उनले २०७८ माघ १५ गते आफ्नो राजीनामा स्वीकृत भइसकेको बताएकी छन्।
दसौं वार्षिक साधारण सभाले आफूले दिएको राजीनामा स्वीकृत गरी पदमा रहँदा काम गरेको समयमा विभिन्न बैंक तथा वित्तीय संस्थाहरु र व्यक्तिहरुसँग भएका वित्तीय कारोबारहरुमा कुनै पनि दायित्व नरहने भनी राजीनामा स्वीकृत गरेको उनको बयान छ ।
यसअघि पक्राउ परेका रोशन राजवंशीले अनुसन्धानका क्रममा संस्थामा सबै पदाधिकारीहरुको दायित्व हुने भएकाले संस्था डुब्नुमा संस्थाका सबै पदाधिकारीहरुको जिम्मेवारी रहने बताएका थिए ।
