काठमाडौँ । प्रगतिशील लेखक सङ्घले “नेपालको प्रगतिवादी आन्दोलनमा सरोज ओलीको योगदान” विषयमा छयहत्तरौँ परिसंवाद कार्यक्रम सम्पन्न गरेको छ ।
केन्द्रीय कार्यालय बागबजारमा २०८१ पुस ५ गते शुक्रबार सो कार्यक्रम सम्पन्न भएको हो ।
कार्यक्रममा विषयवस्तु प्रस्तोता प्राज्ञ नन्दु उप्रेतीले सरोज ओलीको प्रलेसमा आबद्धताले उहाँको लेखन क्षेत्रमा वैचारिक निखारता र जिम्मेवारीबोध अझ गहन हुँदै गएको बताउनुभयो ।
उहाँले भन्नुभयो– ‘सरोज ओलीका लेखनले श्रमसँग जोडिएका मानिसको आवाज बोल्दथ्यो ।’
कार्यक्रममा धारणा राख्नै प्राज्ञ उप्रेतीले ओलीका कथालाई राम्रा कथाको रूपमा बुझ्न सकिने भन्दै उहाँका कथा जनताका जीवनसँग जोडिएको र परिवर्तन तथा जनताका जागरणका पक्षमा लेखिएको दावी गर्नुभयो ।
सरोज ओलीका अत्यधिक रचनाहरू प्रगतिशील दृष्टिकोणमा सीमित भए पनि केही रचना प्रगतिवादी दृष्टिकोणको उचाइसम्म पनि पुग्न सकेको प्राज्ञ उप्रेतीको धारणा थियो ।
उहाँको भनाइ थियो– ‘हामी सबैका रचना प्रगतिशील दृष्टिकोणसम्म मात्र सीमित छ कि प्रगतिवादको उचाइसम्म पुगेको छ भनेर विश्लेषण गर्नुपर्दछ ।
कार्यक्रममा आफ्नो धारणा राख्दै प्रलेसका सल्लाहकार मातृका पोखरेलले सरोज ओलीको साहित्यिक योगदानका सन्दर्भमा कथा, कविता तथा समालोचनको क्षेत्रमा महत्त्वपूर्ण योगदान रहेको दाबी गर्नुभयो ।
उहाँले भन्नुभयो– ‘सरोज ओली वैचारिक रूपमा प्रतिबद्ध हुनुहुन्थ्यो । उहाँको निधनले प्रलेसलाई ठुलो क्षति भएको छ ।’
प्रलेसका अध्यक्ष डा. मधुसूदन गिरीको अध्यक्षतामा अघि बढेको परिसंवादको सञ्चालन सङ्घका उपाध्यक्ष तथा परिसंवाद कार्यक्रमका संयोजक समीर सिंहले गर्नुभएको थियो ।
कार्यक्रममा पूरक टिप्पणी गर्नेहरूमा गोपिरमण उपाध्याय तथा डा. हरिप्रसाद सिलवाललगायत हुनुहुन्थ्यो ।
