कृष्ण केसी, भरतपुर ।
चितवनबाट प्यालेस्टाइनी जनताको पक्षमा हस्ताक्षर अभियान सुरु भएको छ ।
२०८१ पुस ५ गते शुक्रबारका दिन इजरायली साम्राज्यवादको विरोध गर्दै सो कार्यक्रम सुरु भएको हो ।
शुक्रबार दिउसो १२ बजे राष्ट्रिय जनमोर्चासहित आठ राजनीतिक दलले सो कार्यक्रमको उद्घाटन गरेका हुन् ।
वामपन्थी नेता विष्णु घिमिरेले उद्घाटन गर्नुभएको सो कार्यक्रमको सञ्चालन नेकपा (माओवादी केन्द्र) का रामचन्द्रले गर्नुभएको थियो ।
भरतपुरको चौबिसकोठीबाट सुरु भएको इजरायली विस्तारवादले प्यालेस्टाइनमाथि गरेको मानवता विरुद्धको नरसहांर विरुद्धको सो हस्ताक्षर कार्यक्रम पुस महिनाभरि चल्ने राजमो केन्द्रीय सदस्य राजेन्द्र ढुङ्गानाले बताउननुभयो ।
आजदेखि पुस १२ गतेसम्म बिहान ११ बजेदेखि २ बजेसम्म पालिका केन्द्रमा हस्ताक्षर चल्ने छ’ उहाँले भन्नुभयो– पुस १२ गतेदेखि पुस मसान्तसम्म यो अभियान वडास्तरसम्मै चल्ने छ ।’
चितवनको हस्ताक्षर अभियानलाई राष्ट्रिय जनमोर्चा, नेकपा (माओवादी केन्द्र), नेकपा (एकीकृत समाजवादी), क्रान्तिकारी कम्युनिस्ट पार्टी, नेपाल कम्युनिस्ट पार्टी, नेपाल समाजवादी पार्टी, जनता समाजवादी पार्टी र वैज्ञानिक समाजवादी पार्टीले सञ्चालन गरिरहेका छन् ।
