गोपालप्रसाद भट्टराई, सन्धिखर्क ।
इजरायलले प्यालेस्टाइनी नागरिकमाथि गरेको नरसंहारका विरुद्ध अर्घाखाँचीमा पनि छ राजनीतिक दलले हस्ताक्षर अभियान सञ्चालन गर्नेभएका छन् ।
२०८१ पुस २ गतेदेखि प्यालेस्टाइनमाथि इजरायली नरसंहार विरुद्ध देशव्यापी सुरु भएको हस्ताक्षर अभियानको अर्घाखाँचीका छओटा राजनीतिक दलले समर्थन गर्दै यहाँ पनि अभियान सञ्चालन गर्ने निर्णय गरेका हुन् ।
इजरायली कदमको विरोध र हस्ताक्षर अभियानलाई प्रभावकारी बनाउन पुस ३ गते बुधबार राष्ट्रिय जनमोर्चाका नेता शेरबहादुर बिसीको अध्यक्षतामा अर्घाखाँचीमा संयुक्त बैठकसमेत बसेको छ ।
बैठकमा माओवादी केन्द्रका जिल्ला इन्चार्ज ठाकुरकुमार विक, जिल्ला संयोजक राजेन्द्र भुसाल, नेकपा (एकीकृत समाजवादी) का जिल्ला सचिव युवराज पौडेल, नेकपा (मसाल) अर्घाखाँचीका प्रवक्ता पशुपति ढकाल, क्रान्तिकारी कम्युनिस्ट पार्टीका जिल्ला अध्यक्ष राजेन्द्र नेपाली र नेकपाका जिल्ला सदस्य प्रवासलगायतको उपस्थिति रहेको थियो ।
बैठकले पुस ७ गते सन्धिखर्कमा संयुक्त सभा गरी हस्ताक्षर अभियानको आरम्भ गर्ने, पुस १० गते शीतगङ्गामा माओवादी केन्द्र, पाणिनीमा एकीकृत समाजवादी र छत्रदेवमा नेकपाको नेतृत्वमा हस्ताक्षर सङ्कलन अभियान चलाउने निर्णय गरेको छ ।
त्यस्तै, पुस १२ गते मालारानीमा क्रान्तिकारी कम्युनिस्ट पार्टी र पुस १५ गते भूमिकास्थानमा राष्ट्रिय जनमोर्चाको नेतृत्वमा अभियान सञ्चालन गरिने बैठकपछि राजमो जिल्ला उपाध्यक्ष गोपाल पौडेलले जानकारी दिनुभयो । यसरी सङ्कलित हस्ताक्षर संयुक्त राष्ट्र सङ्घको निकायमा पठाइने नेताहरूले बताएका छन् ।
इजरायलद्वारा प्यालेस्टाइनमाथिको ज्यादतीका विरुद्ध विगतदेखि नै विश्वव्यापी रूपमा आवाज उठ्दै आए पनि अहिले फेरि भएको बर्बरता विरुद्ध आफूहरू एक ठाउँमा उभिएको यी दलका नेताहरूले बताएका छन् ।
इजरायलले अमानवीय आक्रमण गरी निरपराध प्यालेस्टाइनी जनताको हत्या गरेकोमा सबैले आवाज उठाउनुपर्ने बैठकको निष्कर्ष रहेको छ ।
