काठमाडौं । पूर्वपश्चिम राजमार्गअन्तर्गत रुपन्देहीको बुटवलस्थित तिनाउ पुलनजिकै बोलेरो जिप दुर्घटना हुँदा दम्पतीसहित ३ जनाको मृत्यु भएको छ।

शुक्रबार राति साढे १२ बजेतिर लु ३ च २४८० नम्बरको बोलेरो जिप तिनाउ पुल नजिकै दुर्घटना भएको इलाका प्रहरी कार्यालय बुटवलले जनाएको छ ।

दुर्घटनामा बुटवल–१२ नयाँ गाउँका ७१ वर्षीय तिलकराम खनाल, उनकी श्रीमती ६७ वर्षीया गौरी खनाल र जिपका चालक ३२ वर्षीय हरि न्यौपानेको मृत्यु भएको इलाका प्रहरी कार्यालय बुटवलका प्रहरी नायब उपरीक्षक (डीएसपी) विजयराज पण्डितले जानकारी दिए।

जिपका चालक पनि बुटवल–१२, नयाँ गाउँमै बस्थे।

‘उपचारका लागि बिरामी लिएर आउँदै गरेको बोलेरो जिप तिनाउ पुल पार गर्नेबित्तिकै पल्टिएको रहेछ’, उनले भने, ‘दुर्घटनालगत्तै अस्पताल पुर्‍याइए पनि चिकित्सकले तीनै जनालाई मृत घोषणा गरे।’