टेकराज भुसाल, सन्धिखर्क ।
अर्घाखाँची जिल्लाको भूमिकास्थान नगरपालिकामा उत्पादित वस्तुको गुणस्तर र लेबलिङसम्बन्धी कार्यशाला गोष्ठी सम्पन्न भएको छ ।
घरेलु तथा साना उद्योग कार्यालय अर्घाखाँचीको आयोजना २०८१ मङ्सिर २१ गते एकदिने कार्यशाला गोष्ठी सम्पन्न भएको हो ।
“उद्यमशील संस्कृति, राष्ट्रको समृद्धि” मूल नाराका साथ सञ्चालन गरिएको कार्यशाला गोष्ठीको भूमिकास्थान नगरपालिकाका नगरप्रमुख झबिलाल थापाले उद्घाटन गर्नुभएको थियो ।
सो अवसरमा प्रमुख थापाले समाजमा भौतिक विकास तीव्र गतिमा अघि बढे पनि, व्यक्तिगत रूपमा जति ठुला घर निर्माण गरिए पनि, आर्थिक रूपमा जति सम्पन्न भए पनि मानिस आफ्नो अन्तरआत्मादेखि हसिलोखुसिलो हुन नसक्ने हो भने भौतिक विकासले मात्रै कुनै सार्थकता राख्न नसक्ने बताउनुभयो ।
पालिकाले कृषि उत्पादन, पशुपालन र पर्यटनलाई प्रमुख आर्थिक आर्जनको लक्ष्यका रूपमा लिएको र उक्त लक्ष्यलाई पछ्याउँदै अघि बढ्ने बताउँदै उहाँले वडा नम्बर १० को सेङलेङ–पाथिभरा मन्दिरमा होमस्टे सञ्चालनका लागि विभिन्न तालिम सम्पन्न भएको बताउनुभयो ।
अर्घाखाँची जिल्लाको सबैभन्दा उच्च टापु वडा नम्बर ९ मसिनाको लेक जानका निम्ति सिढी निर्माण, पोखेडाँडामा पार्क निर्माण र भूमेमन्दिरलाई धार्मिक पर्यटनको रूपमा अघि बढाई आन्तरिक आयवृद्धि गर्दै पालिका अघि बढेको उहाँले बताउनुभयो ।
कार्यक्रममा प्रमुख प्रशासकीय अधिकृत जगदीशचन्द्र नेपाली, भूमिकास्थान–८ का वडाध्यक्ष राजकुमार थापा, सहकारी शाखा प्रमुख शङ्कर अधिकारी र पत्रकार नवीन केसिले कार्यक्रम सफलताको शुभकामना व्यक्त गर्दै यी र यस्ता कार्यक्रमले आफूले प्रयोग गर्ने सामग्रीको गुणस्तर र लेबलिङ थाहा पाउँने हुदा यस्ता कार्यक्रमले ग्रामीण क्षेत्रका जनतालाई फाइदा हुने दाबी गर्नुभयो ।
कार्यक्रममा भूमिकास्थान–२ का वडाध्यक्ष बुद्धिबहादुर थापा, भूमिकास्थान नगरपालिका कार्यक्रम अधिकृत हरिश्चन्द्र भुसाल, विभिन्न शाखाका प्रमुख, भूमिकास्थान नगरपालिका नगरस्तरीय युवा सञ्जालका संयोजक टेकराज भुसाललगायतको आतिथ्य रहेको थियो ।
कार्यक्रममा खाद्य प्रविधि गुण नियन्त्रण कार्यँलयका खाद्य निरक्षिक सरोज खनाल र घरेलु तथा साना उद्योग कार्यालय अर्घाखाँचीका कार्यालय प्रमुख दुर्गा न्यौपानेले उत्पादित वस्तुको गुणस्तर र लेब्लिङ सम्बन्धि प्रशिक्षण दिनुभएको थियो ।
