नेपालगञ्ज । कल्पना फाउन्डेसन नेपाल साहित्य विभागले पठन संस्कृतिको विकासको लागि भन्दै पाठक प्रतिक्रिया कार्यक्रम सम्पन्न गरेको छ ।

२०८१ मङ्सिर ५ गते खजुराको ज्ञानोदय माविमा फाउन्डेसनकी अध्यक्ष कल्पना पौडेल जिज्ञासुको पाँचौँ कृति “कचहरी” कथासङ्ग्रहसित सम्बन्धित रहेर सो कार्यक्रम सम्पन्न भएको हो ।

फाउन्डेसनको साहित्य विभाग संयोजक लेकप्रसाद प्याकुरेलको अध्यक्षता र नेपाल प्रज्ञा–प्रतिष्ठानका पूर्व सदस्यसचिव सनत रेग्मीको प्रमुख आतिथ्यमा सम्पन्न उक्त कार्यक्रम अघि बढेको थियो ।

कार्यक्रममा प्रज्ञा–प्रतिष्ठानका प्राज्ञ शशिराम कार्की, खजुरा वडा नं. ३ का वडाअध्यक्ष पूर्णबहादुर भण्डारी, फाउन्डेसनकी संथापक अध्यक्ष पौडेल, खजुरा प्रज्ञा–प्रतिष्ठान प्राज्ञ परिषद् सदस्य माधव शर्मा, ज्ञानोदय नमुना मावि शिक्षक अभिभावक सङ्घका अध्यक्ष मानबहादुर भण्डारी, ज्ञानोदय नमुना माविका प्रअ तथा फाउन्डेसनका उपाध्यक्ष ऋषिराम सापकोटा, वरिष्ठ गजलकार खगेन्द्र गिरी, भेरी साहित्य समाज केन्द्रीय समितिका सदस्यद्वय भरतबहादुर रानाभाट, चन्द्रावती अधिकारी, साहित्यकारहरू भीम प्रज्ज्वल, भीमबहादुर शाही, इन्दिरा गौतमका साथै दर्जन बढी माध्यमिक विद्यालयबाट आएका शिक्षक–विद्यार्थीसहित २५ जनाले कथासङ्ग्रह “कचहरी” बारे प्रतिक्रिया व्यक्त गरेका थिए ।

साहित्य विभाग सदस्य बोधराज प्याकुरेलको सञ्चालन र कोपिला ज्ञानोदय बहुमुखी क्याम्पसकी क्याम्पस प्रमुख चरित्रा शाहद्वारा स्वागत मन्तब्य राखिएको उक्त कार्यक्रममाथि ऋषिराम सापकोटाले प्रकाश पारेका थिए ।

प्रतिक्रियामा सहभागी पाठकले कचहरीमा समावेश १५ ओटा कथाले समाजमा व्याप्त गरिबी, लैङ्गिक विभेद, कुरीति कुसंस्कार, बेरोजगारी ,जातीय विभेद, वृद्धावश्थाका समस्या, दाइजो प्रथा, पुनर्विवाह, बालशोषण, महिला हिंसा जस्ता घटनाको यथार्थ चित्रण गरिएको, समाजमा भए गरेका गलत अभ्यासको आलोचना गर्दै त्यसको सुधारका पक्षमा केही सुझावसमेत सुझाइएका कारण कृति आलोचनात्मक यथार्थवादका कोणबाट पनि महत्त्वपूर्ण साबित भएको विचार प्रस्तुत गरिएको थियो ।