काठमाडौं । नेकपा (माओवादी केन्द्र) का वरिष्ठ उपाध्यक्ष एवम् पूर्वगृहमन्त्री नारायणकाजी श्रेष्ठले भुटानी शरणार्थी प्रकरणमा आरजु राणामाथि अनुसन्धान हुने भएपछि सरकार ढालिएको जिकीर गरेका छन् ।

सेतोपार्टीलाई दिएको एक अन्तर्वातामा श्रेष्ठले सो प्रकरणमा समातिएका बेचन झासँग राणाको साँठगाँठ रहेको पनि दाबी गरेका छन् ।

नेपाली कांग्रेसका नेता एवम् पूर्वगृहमन्त्री बालकृष्ण खाँण, नेकपा एमालेका नेता तथा पूर्वउपप्रधानमन्त्री टोपबहादुर रायमाझीलगायतलाई पक्राउ गरेर अनुसन्धानको दायरामा ल्याएका तत्कालीन गृहमन्त्री श्रेष्ठले आरजु राणा पनि अनुसन्धानको दायरामा ल्याउन लागेका संकेत गरे ।

‘तपाईंलाई पनि भ्रष्टाचारीलाई कारबाही गर्न थालेको भएर सरकारबाट हट्नुपर्‍यो भन्ने लाग्छ ?’ भन्ने प्रश्नमा श्रेष्ठले जवाफ दिएका छन्, ‘एउटा कारण हो।’

आफ्नो दाबीलाई पुष्टि गर्न श्रेष्ठले अगाडि भनेका छन्, ‘दुइटा घटना बताउँछु। म गृहमन्त्री हुँदा, नक्कली भुटानी शरणार्थी प्रकरणका एक अभियुक्त बेचन झालाई पनि बनाएका थियौं। उनी कहाँ छन् भनेर हामीले पत्ता लगायौं र सो ठाउँको सरकारलाई झा फरार अभियुक्त भएकाले हामीलाई दिन अनुरोध गर्‍यौं। यस्तो अनौपचारिक अनुरोध र सहयोगको प्रक्रिया अघिपछि पनि आपसी समझदारी हुन्छ। तर झाको मामिलामा उनीहरूले दिएनन्। पछिल्लो समय झालाई अरू नै विविध प्रक्रियाबाट पक्राउ गरियो। अघिल्लो दिन, दुई जना पक्राउ परे। भोलिपल्ट कांग्रेसका एक जना नेता बालकोट जानुभयो।’

प्रश्नकर्ता फेरि सोध्छन्, ‘एकजना नेता भन्दा पनि नाम नै भन्नु न।’

श्रेष्ठको जवाफ छ, ‘अहिलेको परराष्ट्रमन्त्रीज्यू (आरजु राणा देउवा)। त्यसपछि पर्सिपल्ट उहाँहरू एउटा व्यवसायीको घरमा बैठक बस्नुभयो। त्यहाँ सरकार बनाउने समझदारी बनाउनुभयो। त्यसको भोलिपल्ट सरकार बनाउनुभयो। ‘सिकवेन्स’ त ठ्याक्कै देखिन्छ।’

सो विषय ‘संयोग मात्रै हुन सक्छ नि’ भन्ने पत्रकारको जिज्ञासामा श्रेष्ठको जवाफ छ, ‘संयोग पनि त्यही दिनको भोलिपल्ट कसरी भयो के ? एक दिन अघि भएको भए पनि हुन्थ्यो नि !’

यो विषय अनुसन्धानकै क्रममा रहेकोले थप भन्न नमिल्ेन पनि श्रेष्ठले बताएका छन् ।

उनले भनेका छन्, ‘म यसबारे थप भन्न चाहन्नँ। किनभने यो अनुसन्धानमै भइरहेको कुरा हो। म आफै सरकारमा गृहमन्त्रीका हैसियतले यो केसको मूल अनुसन्धानकर्ताको नेतृत्वदायी भूमिकामा भएकाले मैले धेरै भन्न मिल्दैन। तर सबै कुरा अनुसन्धानमा थियो।’