विष्णु शर्मा ##

नमुछ्नु दिदी सप्तरङ्गी टीका
ऐलेको तिहारमा
लगाउन ऐले पाउनुहुन्न दिदी
यो भाइको निधारमा

परदेशको ठाउँ पाइदैन छुट्टी
भनेको बेलामा
मिल्दैन पैसा टर्दैन गर्जो
नगए मेलामा

नबस्नू दिदी तिहार आउने
दिनहरू गनेर
नगास्नू दिदी फूलको माला
भाइ आउँछ भनेर

नल्याउनू दिदी उपहार मलाई
बजारमा गएर
रोजगारीले बस्न बाध्य पार्याे
निष्ठुरी भएर

नबनाउूु दिदी चिनी र फिनी
नसुती रातमा
हँुदैन भाइ खुसी भई खान
हजुरको साथमा

सुस्वास्थ्यको कामना गर्नू
ओखर फोरेर
नबस्नू दिदी भाइ आउँछ भनी
मूल बाटो हेरेर

मलाई भनी साचेको काक्रो
टिपेर खानू है
वृद्ध बाबाआमालाई भेट्न
माइतीमा जानू है

भैलेनी आउलान् नाच्दै र गाउँदै
हाम्रो घरआँगन
रमाउँदै भन्लान आएको हामी
भैलेनी मागन

नाच्नी र गाउनी गर्नू है दिदी
भैलीको साथमा
खुसी खुसी भैलेनी दिनू
राखेर सुपामा

मलाई पनि देखाउनू दिदी
भिडियो कलमा
थोरै भए नि दुखेको घाउमा
लगाउला मलाम

आँगनी डिलमा फूलहरू देखी
मन नदुखाउनू
रुनुहुन्छ फेरि बाबा र आमा
पिरहरू लुकाउनु

ती बाला दिन सम्झदा दिदी
यो मुटु भरिन्छ
छिनभरमै घरको जिम्मेवारी
अगाडि ठडिन्छ

सबैले निधारमा सप्तरङ्गी लाउँदा
नरुनू धर्केर
अर्को वर्ष मिलेमा छुट्टी
आउने छु फर्केर