काठमाडौँ । सहकारी ठगी प्रकरणमा पक्राउ परेका रवि लामिछानेलाई आइतबार कास्की जिल्ला अदालतमा उपस्थित गराइएको छ । त्यस क्रममा रविका समर्थकले प्रदर्शन चर्को बनाएपछि प्रहरीले अश्रुग्यास प्रहार गरेको छ ।

राष्ट्रिय स्वतन्त्र पार्टी (रास्वपा) का समर्थकले निषेधाज्ञा जारी भएका स्थान पार गर्न खोजेपछि प्रहरीले पानीको फोहरा र अश्रुग्यास प्रहार गरेको हो ।

कात्तिक २ गते शुक्रबार काठमाडौँबाट पक्राउ परेका लामिछानेलाई म्याद थपका लागि प्रहरीले आइतबार कास्की जिल्ला अदालत, पोखरा लगेको हो।

पोखराको सडकमा समर्थक र प्रहरीको बाक्लो उपस्थिति छ । कात्तिक ३ गते शनिबार पनि रास्वपा शीर्ष नेताहरूसहितले पोखरामा प्रदर्शन गरेका थिए ।

सूर्यदर्शन सहकारीको बचत ठगी गरेको आरोपमा प्रहरीको केन्द्रीय अनुसन्धान ब्युरो (सी.आई.बी.) ले रविलाई पक्राउ गरेको थियो ।
यता, सूर्यदर्शन सहकारीका पीडितले पनि प्रदर्शन गरिरहेका छन् । यी दुवै समूहको प्रदर्शनस्थलको दुरी लगभग ५० मिटरको मात्रै छ । प्रहरीले दुवैतर्फका आन्दोलनकारीलाई रोकिरहेको छ।

यसअघि रास्वपा समर्थक र प्रहरीबिच धकेलाधकेलसमेत भएको थियो । कास्की जिल्ला प्रशासन कार्यालयले निषेधाज्ञा जारी गरे पनि रास्वपाका समर्थकहरूले प्रदर्शन जारी राखेपछि अवस्था तनावग्रस्त बनेको हो ।

पत्रकारमाथि हातपात, क्यामेरा तोडफोडको प्रयास

यता, लामिछानेलाई पक्राउ गरेको विरोधमा पोखरामा भइरहेको आन्दोलनको प्रत्यक्ष प्रसारण गरिरहेको अवस्थामा प्राइम टेलिभिजनका पत्रकार र क्यामेरा पर्सनमाथि आन्दोलनरत पार्टीका कार्यकर्ताले हातपात र तोडफोड गरेको नेपाल पत्रकार महासंघले जनाएको छ ।

आइतबार बिहान ११ः३० बजेतिर पोखराको सहिद चोकमा अध्यक्ष लामिछाने पक्राउको विरोधमा राष्ट्रिय स्वतन्त्र पार्टीका कार्यकर्ताले निषेधाज्ञा तोड्दै जुलुस निकोलेका थिए ।

उक्त जुलुसको प्रत्यक्ष प्रसारण गरिरहेको अवस्थामा आन्दोलनरत कार्यकर्ताले हाम्रो पार्टी विरुद्ध समाचार प्रसारण गर्ने यही टेलिभिजन हो भन्दै प्रत्यक्ष प्रसारणमा संलग्न पत्रकारद्वय निरज तामाङ, अनिता घिमिरे र क्यामेरा पर्सन अर्जुन भण्डारीमाथि हातपात गर्नुका साथै क्यामेरा तोडफोडको प्रयास गरिएको महासङ्घले जनाएको छ ।

“नागरिकलाई सुसूचित गराउन सञ्चारकर्ममा खटिरहेका पत्रकारमाथि एउटा स्थापित पार्टीका कार्यकर्ताबाट भएको यो हर्कत अत्यन्त निन्दनीय र प्रेस स्वतन्त्रतामाथिको प्रहार हो” महासङ्घले आइतबार विज्ञप्ति प्रकाशित गरी भनेको छ– “यो घटनाले पत्रकारको र नागरिकको संविधानप्रदत्त अधिकारमा हस्तक्षेप भएको महासङ्घको ठहर छ । महासङ्घ घटनाको कडा शब्दमा भर्त्सना गर्दछ ”

घटनामा संलग्नमाथि तत्काल कानुनी कारबाहीको प्रक्रिया अगाडि बढाई पत्रकारलाई निर्धक्क र निर्वाध रूपमा सञ्चारकर्ममा जुट्ने वातावरण निर्माण गर्न सम्बन्धित निकायको ध्यानाकर्षण गराइएको छ साथै संविधानले सुनिश्चित गरेको पूर्ण प्रेस स्वतन्त्रताको ख्याल गरी त्यसलाई सम्मान गर्न सम्बन्धित पार्टीको पनि महासङ्घले ध्यानाकर्षण गराएको छ ।