काठमाडौं । प्रमुख प्रतिपक्षी दल नेकपा (माओवादी केन्द्र) का अध्यक्ष पुष्पकमल दाहाल प्रचण्डले बोलाएको विपक्षी दलहरूको बैठकमा सरकारमै सहभागी दुई दलसमेत सहभागी भएका छन् ।
शुक्रबार नयाँ बानेश्वरस्थित संघीय संसद् भवनमा बसेको विपक्षी दलहरुको बैठकमा लोकतान्त्रिक समाजवादी पार्टी (लोसपा) र नागरिक उन्मुक्ति पार्टी (नाउपा) पनि सहभागी भएका हुन् । बैठकमा लोसपा अध्यक्ष महन्थ ठाकुर र नाउपा अध्यक्ष रञ्जिता श्रेष्ठ उपस्थित थिए ।
लोसपा र नाउपा दुवै वर्तमान सरकारमा सहभागी छन्। सत्तारुढ गठबन्धनमा सहभागी भए पनि उनीहरू शुक्रबार विपक्षी दलको बैठकमा उपस्थित भएका हुन्।
बैठकमा सहभागी एक नेताका अनुसार, बैठक सुरु हुँदा नै महन्थ ठाकुर पुगिसकेका थिए। रन्जिता भने केहीबेर पछि बैठकमा पुगेकी थिइन्।
प्रधानमन्त्री केपी शर्मा ओली नेतृत्वको मन्त्रिपरिषद्मा महन्थ नेतृत्वको लोसपाबाट शरतसिंह भण्डारी श्रम, रोजगार तथा सामाजिक सुरक्षा मन्त्री छन्।
त्यस्तै, नाउपाबाट अरुणकुमार चौधरी संस्कृति, पर्यटन तथा नागरिक उड्ययन राज्यमन्त्री छन्।
प्रतिपक्षी दलहरूको बैठकले बाढीपहिरोमा सरकारले गरेको ढिलासुस्तीबारे प्रश्न गर्दै आगामी कात्तिक ५ गते सरकारलाई ज्ञापन पत्र बुझाउने निर्णय गरेको छ।
बैठकमा माओवादी केन्द्रसहित राष्ट्रिय स्वतन्त्र पार्टी (रास्वपा), राष्ट्रिय स्वतन्त्र पार्टी (राप्रपा), नेकपा एकीकृत समाजवादी र आम जनता पार्टीका शीर्ष नेताहरू सहभागी थिए।
