काठमाडौँ । समाचार सङ्कलनका क्रममा उदयपुरबाट प्रकाशित पूर्णपुष्टि साप्ताहिक र पूर्णपुष्टि डट कम तथा एभिन्यूज टेलिभिजनमा कार्यरत पत्रकारद्वय विक्रम राई र सुनिल राईमाथि भएको आक्रमण र तोडफोडको घटनाप्रति नेपाल पत्रकार महासङ्घले विरोध गरेको छ ।
महासचिव रोशन पुरीले २०८१ असोज २४ गते जारी गर्दै महासङ्घको विरोध भएको जनाउनुभएको हो ।
महासङ्घ उदयपुर शाखाका अनुसार असोज २३ गते बुधबार उदपुरस्थित कोष तथा लेखा नियन्त्रण कार्यालयको चमेनागृहमा रहेको रौता स्प्रिङ वाटर प्रालिबाट उत्पादित खानेपानीको सिलप्याक जारभित्र कुखुराको प्वाँखलगायत अखाद्य सामग्री भेटिएको थियो ।
सोही विषयमा समाचार सङ्कलनका लागि उदयपुरको त्रियुगा नगरपालिका–३ मोतिगडामा रहेको पानी उत्पादक कम्पनीमा पुगेर भिडियो खिच्ने क्रममा पत्रकारद्वयमाथि सञ्चालक पर्शुराम चौधरी र उनका परिवारजनले आक्रमण गरी पत्रकारको क्यामेरा तोडफोड र मोबाइल नियन्त्रणमा लिएको थियो ।
“जनस्वास्थ्यमा प्रत्यक्ष सरोकार राख्ने खानेपानीमा भेटिएको अखाद्य सामग्रीबारे नागरिकलाई सुसूचित र सचेत गराउने कार्यमा जुटेका पत्रकारमाथि भएको हर्कत अत्यन्त निन्दनीय र प्रेस स्वतन्त्रता विरोधी कार्य हो” महासङ्घले अगाडि भनेको छ– “महासङ्घ घटनामा संलग्नमाथि तत्काल कानुनी कारबाहीको प्रक्रिया अगाडि बढाई प्रेसलाई निर्वाध र निर्भीक रूपमा काम गर्ने वातावरण निर्माण गर्न सम्बन्धित निकायसँग माग गर्दछ साथै जनस्थास्थ्यसँग जोडिएको खानेपानीको विषयमा खेलबाड र लापर्बाही गर्ने कम्पनीको गुणस्तरको छानबिन गरी आवश्यक कारबाहीका लागि ध्यानाकर्षणसमेत गराउँछ ।”
