सुशील लामा##

झुपडीमा झोक्राएर बसेको गुञ्जमानलाई
आश्वासनको बजारमा ओरालेर
कोरा सपनाको व्यापार गर्न सिकाए
दुईचार जना अगाडि बोल्दै गर्दा
थरथर काप्ने गुञ्जमान
हजारौँ मानिसको अगाडि उभिएर
खरर्रर भाषण गर्न सक्ने बनाए
जनतामाझ बिक्ने कुरा गर्न माहिर बने
गुञ्ज मान
प्रिय नेताको खास मानिस बने

अनेक चुनावमा नक्कली मुकुन्डो लगाएर
आएका नेतालाई
पटक पटक जिताएर पठाए
नेता, मन्त्री, सांसद के के बने के के
पावर, पद र कुर्सीको नसाले
विस्तारै गुञ्जमान र नेताको बिचको सम्बन्धमा
पुर्न नसकिने खाडल बने
नेताले आफ्नालाई मात्रै देख्न थाले
गुञ्जमानको गुनलाई विस्तारै भुले

नेताले गाउँ भुले
गाउँसँग खाएको कसम विस्तारै भुल्दै
मुकाम हुँदै सहर पसे
गुञ्जमानहरू देशै छोडेर
अरूको देशमा सस्तो श्रमको व्यापारमा
तल्लीन हुन विवस हुन बाध्य भए
गुञ्जमानको शरद ऋतुको उमङ्ग खोसेर
जिन्दगीको थाप्लोभरि
हिउँद ऋतुको तुसारो उपहार दिए
बाआमाको अनुग्रह बिनाको फैसलाले
जीवन जित्न अरूको माटोलाई स्याहार्दै
बाँच्ने आशाको जोहो गर्दै गरेको
गुञ्जमान
लचिलोपन अझै बाँकी छ ऊभित्र
जीवनभर कहिले पनि विस्थापित नहुने
शपथ खाएर
जारी राखेर सुमधुर यादहरू
बाँकी जीवनलाई बचाउँदै छ

अनुहारमा कहिलेकाहीँ झुल्केको हाँसो
निकट विगतमा गुजारेको राजनैतिक यात्रा
परदेशमै बनेका साथीहरू
प्रेम, बसन्त, शरद अनि युद्ध
अभिनाशसँग मिलेर
प्रवासमै गठन भएको छ मञ्च
अटल र बलियो एकताको भरोसा
छाता सङ्गठन अमुक पार्टीको
प्रवासी भ्रातृ सङ्गठनको अध्याय
जीवन रचना, बिनास्वार्थको प्रारम्भिक मञ्च
साझा भावनाको प्रतिनिधित्व गर्न

जाडो महिनाको कुनै एक दिन
परदेशमा अवस्थित प्रवासी संगठनलाई
सम्म्बोधन गर्न
उहीँ नेता
जुन नेताको बदनियतपूर्ण छलले
थुप्रै गुञ्जमानका जीवनका वर्ष
उराठउजाड बनेका छन्

आफ्नो भन्न नमिल्दो अरुको देशमा
आज त्यही नेतालाई
उहीँ धोका खाएका युवाहरूले
अरूको ठाउँमा, अरूको देशमा
भारी मन बोकेर
गुञ्जमानहरू
प्रेमिल कालो झन्डा देखाउँदै
अँगालोभरिको भव्य स्वागत गर्दै छ

(पाँचखाल–११, काभ्रेपलान्चोक हाल लिमासोल, साइप्रस)