काठमाडौँ । छ किसान सङ्गठनले बाढीपहिरोपीडितप्रति राज्यले उदासिनता व्यक्त गरेकोमा विरोध गरेका छन् ।
२०८१ असोज १३ गते आइतबार संयुक्त प्रेसवक्तव्य जारी गर्दै उनीहरूले यस्तो धारणा व्यक्त गरेका हुन् ।
असोज ९ देखि १२ गतेसम्म आएको अविरल वर्षाका कारण भौतिक संरचना, किसान परिवार र आम जनता प्रभावित भएकोमा चिन्ता व्यक्त गर्दै उनीहरूले सो प्रेसवक्तव्यमार्फत् समवेदना, सहानुभूति तथा पूर्वसतर्कताका लागि अपिल गरेका छन् ।
पूर्वसतर्कताको जानकारी भएर पनि प्रभावितको उद्धार र राहतमा सरकार घोर उदासिन तथा लापरबाह देखिएकोमा उनीहरूले सरकारको आलोचनासमेत गरेका छन् ।
भौतिक संरचनाको अमैत्रीपूर्ण स्वरूप, जलाधार क्षेत्रको अतिक्रमण, भूगर्भ इन्जिनियरका सुझावको बेवास्ता तथा भौतिक पूर्वाधार निर्माणमा भ्रष्टाचारले गर्दा बाढीपहिरोले रौद्र रूप लिएको उनीहरू धारणा छ ।
प्रेसवक्तव्यमार्फत उनीहरूले पीडितलाई पर्याप्त राहत, क्षतिपूर्ति दिँदै आगामी दिनमा जनधनको क्षति हुन नदिन प्रष्ट, मूर्त र ठोस वैज्ञानिक तथा प्रकृतिमैत्री योजना बनाई कार्यान्वयन गर्नसमेत आग्रह गरेका छन् ।
प्रेसवक्तव्यमा अखिल नेपाल किसान महासङ्घ (अप्फा) का अध्यक्ष भैरवराज रेग्मी, अखिल नेपाल किसान महासङ्घ (क्रान्तिकारी) का अध्यक्ष चित्रबहादुर श्रेष्ठ, अखिल नेपाल किसान महासङ्घका अध्यक्ष बलराम बाँस्कोटा, अखिल नेपाल किसान महासङ्घ (क्रान्तिकारी) का अध्यक्ष सीताराम तामाङ, अखिल नेपाल किसान यूनियनका इन्चार्ज लोकनारायण सुवेदी र अखिल नेपाल प्रगतिशील किसान सङ्घका अध्यक्ष दुर्गाप्रसाद जैसीको हस्ताक्षर रहेको छ ।
